14 марта 2012 г.
«Пÿрте кĕрсен мĕн сас лайăх? Ача-пăча сасси лайăх», — тенĕ пĕр юрăра. Чăнах та, ачасемсĕр çемьере темскер çитмест пек: пÿрт пушă, кичем. Пирĕн çĕр-шывра çураласлăх пĕчĕк пулнă пирки патшалăх йышлă çемьесене тĕрлĕ енлĕ пулăшу пама тăрăшать. 2007 çулта пурнăçа кĕме пуçланă программа тăрăх Раççей Пенси фончĕ иккĕмĕш е ун хыççăнхи ачасене çуратакансене амăш капиталне парать.
Мартăн 6-мĕшĕнче, Пĕтĕм тĕнчери Хĕрарăмсен кунĕ умĕн, Пенси фончĕн районти управленийĕнче тепĕр 6 çемье сертификатлă пулса тăчĕ. Пуçтарăннисене район пуçлăхĕ Евгений Карпеев тата Пенси фончĕн районти управленийĕн начальникĕ Сергей Горбунов ăшшăн саламларĕç, ырлăх-сывлăх, ăнăçу сунчĕç.
Савăнăçлă лару-тăрура Алсу Зейнетдинова, Надежда Оболонкина, Людмила Кузьмина, Любовь Мамуткина, Надежда Львова тата Алия Хамбикова сертификат илчĕç. Сăмах май, А.Хамбиковăна пирĕн районти 900-мĕш сертификат тивĕçрĕ.
Çамрăк аннесене вĕсен ĕç вырăнĕсенчен килнĕ представительсем саламларĕç, парнесем пачĕç. Юлашкинчен Комсомольскинчи ача-пăча искусство шкулĕн вĕренекенĕсем юрăсемпе савăнтарчĕç, савăк кăмăл парнелерĕç.
Источник: "Каçал Ен"