07 марта 2012 г.
Районти ăстасен «Фантазия» конкурсĕ малалла пырать.
Февралĕн 29-мĕшĕнчен пуçласа мартăн 18-мĕшĕччен Шурут ял тăрăхĕнчи ал ĕçне юратакансен ĕçĕсемпе паллашма май пулĕ.
Шурутри ял клубĕн директорĕ Л.С.Козлова ăста алăллă пулнине пурте пĕлетпĕр. Вăл районта иртекен куравсене активлă хутшăнать. Людмила Степановна клуб çумĕнчи «Улах» кружока ертсе пырать. Кружок членĕсене хушпу, тухья тума вĕрентет, чăваш наци тĕррин вăрттăнлăхĕсемпе паллаштарать. Унсăр пуçне вĕтĕ шăрçаран тĕрлĕрен хитре япаласем тума вĕрентет. Акă Луиза Носкова çак кружока пĕччен мар, хăйĕн Настя ятлă тĕпренчĕкĕпе пĕрле çÿрет.
Ольга Шмелева, Никита Кузнецов, Диана Шагарова, Владимир Андреев, Регина Архипова, Лиана Тимайкина — «Улах» кружок членĕсем вĕтĕ шăрçаран тунă япаласем курава илем кÿреççĕ.
М.П.Амуткина ĕмĕрĕпех тăван колхозра вăй хунă. Пушă вăхăтра тĕрĕ тĕрлет, чăлха-алсиш эрешлесе çыхать.
Р.Н.Архипова Аслă Арапуç шкулĕнче вĕренет, вĕтĕ шăрçаран мăй çыххисем хатĕрлет.
Е.А.Шикова магазинта ĕçлесен те тĕрĕ тĕрлеме пушă вăхăт тупать.
О.Т.Мулгачева, В.П.Котеева çыхнă пĕчĕк минтерсемпе, диван, кресло, телевизор çивиттийĕсемпе пÿрте илемлетме юратаççĕ.
И.Н.Алексеева Шурутри шкул библиотекинче ĕçлет, çемçе пуканесем çĕлет. В.А. Алексеева салфеткăсем чĕнтĕрлесе çыхать. Л.Н.Шмелева шурă тутăрсем çине хитре тĕрĕсем лартать.
А.Н.Кузьмин йывăçран пичке, куркасем касса тăвать.
Тутар Шурут ялĕнчи почтальонка Г.Х.Гайнялова эрешлĕ тутăрсем çыхать.
Асăннă ăстасене хăйсен пултарулăхĕпе паллаштарма кăмăл тунăшăн тав тăватпăр, пурне те курава çитсе курма чĕнетпĕр.
Источник: "Каçал Ен"