03 марта 2012 г.
Нумаях пулмасть районти ача-пăча библиотекинче Çĕр-шыв хÿтĕлевçин кунне халалланă «Туслăн çара кайăпăр» мероприяти иртнĕ. Ăна вăйă-конкурс евĕр йĕркеленĕ. Уява Комсомольски 1-мĕш вăтам шкулĕн 5-мĕш «б» класс вĕренекенĕсене чĕннĕ (класс ертÿçи Н.В.Сереброва).
Библиотекарьсем вырăс çарĕн историйĕпе, йăли-йĕркипе паллаштарчĕç, ĕлĕк çар çыннисене епле вĕрентнине каласа пачĕç. «Хÿтĕлевçĕсем» тата «Çăлтăр» командăсене пайланса арçын ачасем тĕрлĕ конкурссенче тупăшрĕç, хĕр ачасем айккинче вĕсене хавхалантарса тăчĕç.
Ыйтусем çине хуравласа вĕренекенсем хăйсен пĕлĕвне кăтартнипе çеç мар, вырăс çарĕ, çапăçу йăли-йĕркисем, çар ĕçĕн историйĕ çинчен нумай çĕнни пĕлчĕç. Тавçăрулăх, çивĕчлĕх кăтартса арçын ачасем хăйсем çĕр-шыв хÿтĕлевçисем пулма тивĕçлине çирĕплетрĕç.
Конкурсра туслăх çĕнтерчĕ, хутшăнакансене парнесем парса хавхалантарчĕç.
Источник: "Каçал Ен"