03 марта 2012 г.
Çак кунсенче районти ДОСААФ уйрăмĕнче ĕçлекенсем Раççей ДОСААФне туса хунăранпа 85 çул çитнине уявларĕç. Савăнăçлă лару-тăрура 15 çынна юбилей медалĕ парса чысларĕç. Тухса калаçакансем районти ДОСААФ уйрăмĕн ĕçне çÿллĕ шайра хакласа малалла та ăнăçлă ĕçлеме сунчĕç.
85 çул хушшинче Раççей ДОСААФĕн ятне те, тытăмне те темиçе хут улăштарнă. Çакăн йышши организацие туса хурас ыйту иртнĕ ĕмĕрĕн 20-мĕш çулĕсен пуçламăшĕнчех çуралнă. 1927 çулта вара СССР наркомĕ К.Ворошилов сĕннипе оборона тата авиаципе хими промышленноçне пулăшса тăма СССР Осоавиахимне туса хунă. Аслă Отечественнăй вăрçă çулĕсенче Осоавиахим Совет Çарне пур енлĕн пулăшу кÿме тăрăшнă. Çавăншăн 1947 çулта организацие Хĕрлĕ Çăлтăр орденĕ парса чысланă.
Районти Осоавиахим уйрăмĕ 1939 çулта, Комсомольски районне туса хурсанах, ĕçлеме пуçланă.
1948 çулта Осоавиахим 3 пая пайланнă: ДОСАРМ, ДОСАВ тата ДОСФЛОТ. Çак 3 организаци çĕр-шыва çирĕплетме, çар вăйĕсене аталантарма чылай ĕç тунă. Вăхăт иртсен 3 уйрăма йĕркелесе пыма çăмăл марри, ертсе пыракан пысăк аппарат кирли палăрнă. Çавăнпа та 1951 çулта вĕсене пĕрлештерсе пĕр организаци — СССР ДОСААФĕ туса хунă. Пулăшу обществине кайран та темиçе хут реорганизациленĕ. Юлашки улшăнусене 2009 çулхи декабрь уйăхĕнче туса ирттернĕ.
Паянхи кун та ДОСААФăн районти уйрăмĕ тивĕçĕсене чыслăн пурнăçласа ăнăçлăн ĕçлесе пынине, çитĕнекен ăрура патриотизм туйăмне аталантарма нумай тăрăшнине палăртмалла.
Источник: "Каçал Ен"