25 февраля 2012 г.
Районти физика учителĕсен ассоциацийĕ нумай çул ĕнтĕ педагогсен çĕнĕ вĕренÿ технологийĕсене алла илме пулăшас шутпа физика урокĕсен фестивальне ирттерет. Фестиваль вăхăтĕнче пĕр-пĕрин ĕç опычĕпе, çĕнĕ технологисемпе уроксенче мĕнле усă курнипе паллашма пулать. Кăçалхи физика урокĕсен районти 18-мĕш фестивалĕ Нĕркеçри вăтам шкулта иртрĕ. Уçă уроксен конкурсне сакăр учитель хутшăнчĕ. Ирттернĕ кашни урок хăйĕн илемĕпе, çĕнĕлĕхĕпе палăрчĕ, вĕсенче ытти учительсемшĕн вĕренмелли нумай пулчĕ.
Г.Н.Петров «Сасă тата чăваш халăхĕн кĕвĕ хатĕрĕсем» темăпа урок ирттерчĕ. Мĕнле кăна меслетпе усă курмарĕ-ши Геннадий Николаевич? Кунта пурин те вĕренмелли нумай пулчĕ. Ачасемшĕн те савăнăç — урăх ăçта хăв аллупа çак кĕвĕ хатĕ-рĕсене тытса выляма пултарăн-ха; Çĕр çул ытла сассипе çынсене савăнтарнă шăнкăрав хăех мĕне тăрать.
В.Н.Петров (Комсомольски 1-мĕш вăтам шкулĕ) хăйĕн турнир-урокĕнче вĕренекенсене нумай япаласемпе пулăмсене урăхларах, физика наукипе усă курса ăнлантарма пулăшрĕ.
В.Ф.Григорьев (Хирти Явăш тĕп шкулĕ) «Çут çанталăкăн вăрттăн тĕнчи» урокĕнче L-micro физика приборĕсемпе усă курса электричествăпа магнит вăрттăнлăхĕсене кăтартса пачĕ.
И.И.Евграфова (Аслă Чурачăк вăтам шкулĕ) хальхи вăхăтри çĕнĕ технологисемпе усă курса пурнăçра кирлĕ япаласем çинчен ăнлантарса панисĕр пуçне тĕрлĕ пулăмсене опытсем туса сăнама вĕрентрĕ.
В.Н.Павлов (Çĕнĕ Мăрат вăтам шкулĕ) опытсем ирттерсе хăйĕн пултарулăхне тĕрлĕ енлĕн кăтартма пултарчĕ. «Тĕлĕнтермĕш опытсем» темăпа иртнĕ урокра ачасем хăйсене асамлăх тĕнчинче пулнă евĕрлех туйрĕç.
Г.М.Салеева (Чĕчкен тĕп шкулĕ) ирттернĕ урокра ачасем электричество тĕнчипе киленсе тĕрлĕ вăрттăнлăхсене тĕпчерĕç.
С.В.Абукина (Хырай Ĕнел вăтам шкулĕ) урокĕ те хăйне май тĕлĕнтермĕш — «Аннен кухнин вăрттăнлăхĕ». Апат хатĕрленĕ чухнехи пулăмсене физика саккунĕсемпе чиперех ăнлантарма пулать иккен.
А.П.Петров (Нĕркеç вăтам шкулĕ) урокĕнче хальхи вăхăтра вăтам шкул пĕтерсен тытакан экзамен çинчен пĕлме пулчĕ.
Фестиваль иртнĕ кун Нĕркеç шкулĕнчи ачасемшĕн курмалли-пĕлмелли нумай пулчĕ. Районти шкулсенче вĕренекен ачасем хатĕрленĕ ĕçсен выставки уйрăмах килĕшрĕ. Тĕрлĕ модельсем, тĕпчев ĕçĕсем, ачасен проекчĕсем — пурте куç умĕнче. Учительсем те тĕрлĕ методика хатĕрĕсемпе, физика кабинечĕн паспортне мĕнле хатĕрлемеллипе, урок вăхăтĕнче ачасем ĕç хăрушсăрлăхне мĕнлерех ирттермеллипе паллашрĕç.
«Çавра сĕтел» тавра пулнă калаçусенче хальхи пурнăç йывăрлăхĕсене пăхмасăр пулас ăрăва пурнăç çулĕ çине тухма мĕнлерех пулăшмалли çинчен сăмах пычĕ. Физика урокĕсен пуласлăхне лайăхлатас енчен панă сĕнÿсем те пулчĕç. Çав вăхăтрах физикăпа иртекен ППЭне ачасене мĕнлерех хатĕрлеме пулни çинчен те шутларĕç вĕрентекенсем. Районти шкулсенче ĕçлекен физика учителĕсем ватăлса пынине те пăшăрханса палăртрĕç вĕсем. Фестиваль вĕçĕнче Нĕркеçри шкулта вĕренекен çамрăк артистсен концерчĕ пурне те пурнăç илемĕпе киленме пулăшрĕ. Сÿнмест иккен ку шкулта пултарулăх çăл куçĕ.
Физика урокĕсен 18-мĕш фестивалĕ хыçа юлчĕ, малалла — республикăри физикăпа математика урокĕсен фестивалĕ. Районти çĕнтерÿçĕсем кашни çулах республика шайĕнче дипломсем çĕнсе илеççĕ, кăçал та çаплах пуласса шанатпăр.
Источник: "Каçал Ен"