22 февраля 2012 г.
Февралĕн 18-мĕшĕнче «Кĕтне» ентешлĕх кунне Шупашкар хулинчи П.П.Хусанкай ячĕллĕ культура керменĕнче йĕркелерĕç. Комсомольски районĕнче чăваш, вырăс, тутар халăх ывăл-хĕрĕ килĕштерсе пурăннăран, уяв девизне те «Туслăх» — «Дружба» —«Дуслык» тесе палăртнă.
Район администрацийĕн пуçлăхĕ Геннадий Волков тата «Кĕтне» ентешлĕхĕн председателĕ Александр Капитонов уçрĕç уява, пуçтарăннисене лайăх канма, вăхăта усăллă ирттерме сунчĕç. Геннадий Федорович хулара пурăнакансене районăн ĕçĕ-хĕлĕ, иртнĕ çулхи çитĕнĕвĕсем çинчен кĕскен каласа пачĕ. «Пирĕн районти чи пысăк пуянлăх — ĕçчен те пултаруллă халăх. Виçĕ наци çыннисем пĕр-пĕринпе килĕштерсе, туслă пурăнни нумай йывăрлăха çĕнме, района малалла аталантарма пулăшать», — палăртрĕ Геннадий Федорович. Çавăн пекех район энциклопедийĕн иккĕмĕш томне кăларас енĕпе ĕçленĕ ушкăнăн ертÿçине Владимир Яковлевич Григорьева тав сăмахĕ каларĕ, 80 çулхи юбилейпе район администрацийĕн Хисеп грамотипе наградăларĕ. Чăваш Республикин Патшалăх Канашĕн депутачĕсем Петр Красновпа Кияметдин Мифтахутдинов та зала пухăннă ентешсене туслăх уявĕпе саламларĕç.
Яланхи пекех, каçалсене саламлама кÿршĕ районсен ентешлĕхĕсен пуçлăхĕсем килнĕ. Александр Капитонов ентешлĕх ĕç-хĕлне хастар хутшăнакан, тĕрлĕ мероприятисем йĕркелеме укçа-тенкĕпе пулăшакансене чунтан тав турĕ, «Ентешлĕх умĕнчи тава тивĕçлĕ ĕçсемшĕн» медальсем, Тав çырăвĕсем парса чысларĕ. Кунашкал чыса Геннадий Волков, Кияметдин Мифтахутдинов, Валентина Курицына, Сергей Егоров, Геннадий Гончаров, Валерий Гордеев, Киям Пахалов, Сергей Лукиянов тата Роберт Сорокин тивĕçрĕç.
Пирĕн ентешлĕх канашĕ аслисемпе çамрăксен çыхăнăвне те татасшăн мар. Çакна палăртса тата спорт вăййисене хутшăнтарас тĕлĕшпе Шупашкарти вĕренÿ учрежденийĕсенче ăс пухакан каччăсем хушшинче нумаях пулмасть волейбол, футбол вăййисем ирттернĕ. Çак турнирсенче мала тухнисене ЧР футбол федерацийĕн ертÿçи Александр Жуков кубоксем тата медальсем пачĕ, вĕренÿре, пурнăçра ăнăçусем сунчĕ.
Уяври концерт программи анлă та пуян пулчĕ. Районти тĕрлĕ ялта çуралса ÿснĕ, Шупашкарта пысăк сценăсене парăнтарнă юрăçсем пултарулăхĕпе савăнтарчĕç. Пĕр тăван Малинасене (Хирти Выçли), Светлана Печникова-Романовăна (Тукай), Оксана Ласточкинана (Анат Тимĕрчкасси) куракансем хапăлласа йышăнчĕç. Кĕçĕн Çĕрпÿел хĕрĕ Зинаида Козлова ертсе пыракан «Уяв» халăх фольклор ансамблĕ, Александровка культура çурчĕ çумĕнчи художество пултарулăх ушкăнĕ, «Мишар» эстрадăпа фольклор ансамблĕ, Виталий Адюков юрă-ташăпа савăнтарчĕç. Арçынсен нумай пулмасть йĕркеленнĕ ансамбльне те куракансем кăмăлларĕç. Вĕсем хут купăса та ăста калаççĕ, илемлĕ юрлаççĕ те. Çĕнĕ ушкăна мĕнле ят парасси пирки Валери Туркай сĕнÿсем йышăнчĕ. Пĕрисем ăна «Туслăх», иккĕмĕшсем «Кĕтне» ят пама сĕнчĕç. Хăшне йышăнассине ушкăнри çынсем татса парĕç.
Валентина Курицынапа Валери Туркай уяв программине питĕ килĕшÿллĕ ертсе пычĕç. Шупашкарпа Çĕнĕ Шупашкар хулисенче тĕпленнĕ ентешĕмĕрсен çак кун пĕр-пĕрне курса чунтан калаçма та, çĕнĕ хыпарсене пĕлме те вăхăт çителĕклĕ пулчĕ.
Источник: "Каçал Ен"