04 февраля 2012 г.
Н.Немцев Çĕнĕ Мăратра çуралса ÿснĕ. Вăтам шкул пĕтерни çинчен алла аттестат илсен Вăрнарти совхоз-техникума вĕренме кĕнĕ, ăна ăнăçлă пĕтернĕ. Ун хыççăн çамрăк специалиста ятарлă направленипе Казахстана ĕçлеме янă.
Темиçе çултан Николай Егорович тăван ене таврăнать, Çĕнĕ Мăрат, Шурут, Чĕчкен ветеринари участокĕсенче тăрăшать.
1990 çулта Н.Немцева районти выльăх-чĕрлĕх чирĕсемпе кĕрешекен станцире ертÿçĕн «тилхепине» тытма шанаççĕ.
Ĕçленĕ вăхăтра вăл Хусанти ветеринари институтĕнчен куçăмсăр майпа вĕренсе тухать. Хăйĕн пурнăçĕнче Николай Егорович мĕн чухлĕ çамрăк специалиста паха опытне паман-ши; Вĕсенчен пĕри — аслă хĕрĕ Татьяна. Паянхи кун вăл ашшĕпе пĕр коллективра ĕçлет.
Сăмах май, Лидия Леонтьевна, Николай Егоровичăн мăшăрĕ, Вăрнарти ветеринари техникумне пĕтернĕ. Вăл та пурнăçне выльăх-чĕрлĕхпе çыхăнтарнă: Шурутри сĕт-çу фермин заведующийĕнче тăрăшать. Немцевсен ял хуçалăхĕнчи пĕтĕмĕшле ĕç стажĕ — 60 çул ытла.
Нумаях пулмасть Николай Егорович 60 çулхи юбилейне паллă турĕ. Тулли кĕрекене ларса ăна ĕçтешĕсем, тус-тăванĕсем саламларĕç.
Источник: "Каçал Ен"