01 февраля 2012 г.
Иртнĕ шăмат кун районта сывă пурнăç йĕркине тытакан ветерансем «Кĕтне» физкультурăпа спорт комплексĕн стадионĕнче йĕлтĕрпе кĕске дистанцие чупса ăмăртрĕç.
Чи малтанах спортсменсене саламласа Раççей пенсионерĕсен союзĕн Чăваш Енри уйрăмĕн председателĕ Валерий Сапожников, район администрацийĕн пуçлăхĕ Геннадий Волков, ЧР Патшалăх Канашĕн депутачĕ, «Газпром межрегионгаз Чебоксары» ООО генеральнăй директорĕ Кияметдин Мифтахутдинов, ЧР Патшалăх Канашĕн социаллă политика тата наци ыйтăвĕсен комитечĕн председателĕ Петр Краснов тата ыттисем те сăмах каларĕç.
Ăмăрту умĕн савăнăçлă лару-тăрура ĕçри хастарлăхшăн район çыннисене «Чăваш Республикин ĕç ветеранĕ» ята парса чысларĕç, удостоверенисем пачĕç. Хисеплĕ ята тивĕçнисем: Валентина Бакеева (Йÿç Шăхаль), Гельсирен Мушарапова, Рафикапа Тяфкил Сялимзяновсем (Тутар Шурут), Геннадий Павлов (Хирти Выçли), Валентина Волковăпа Альберт Орлов, Лидия Смирнова (Шурут-Нурăс), Мария Павловăпа Иван Яндров (Асанкасси) тата Елена Николаева (Комсомольски). Вĕсен ячĕпе Тяфкил Бедертдинович сăмах илчĕ. «Пирĕн ĕçе Чăваш Ен Правительстви тивĕçлипе хакланине çирĕплетсе пачĕ. Çакă пире, ачаранах уй-хирте, ытти отрасльте ĕçлесе пиçĕхнĕ çынсене, питĕ хавхалантарчĕ»,— терĕ вăл. Ветерансене тĕп хуламăртан килнĕ хăнасем тата район администрацийĕн социаллă хÿтлĕх пайĕн начальникĕ Ирина Никитина саламларĕç, ырлăх-сывлăх сунчĕç. Ун хыççăн районти культурăпа кану центрĕн ĕçченĕсем— Альбинăпа Виктор Кокшинсем, В.Павлов, В.Курицына, В.Тимофеева, Л.Носова юрăсем шăрантарчĕç.
«Спринт» ăмăртăва тăватă ушкăнпа ирттерчĕç. Хĕрарăмсем старта малтан тухрĕç. Хĕрÿ тупăшура Тукайра пурăнакан Зинаида Алексеева пĕрремĕш вырăн йышăнчĕ.
Арçынсем виçĕ ушкăнпа старта тăчĕç: 60—65, 65—70 çулхисем тата 70 çул тултар- нисем. Аслă çултисенчен Раççейри пенсионерсен союзĕн районти уйрăмĕн председателĕ Василий Пундяков финиша чи малтан чупса çитрĕ. Ытти ушкăнсенче Алексей Волков (Нĕркеç), Николай Ятманов (Хырхĕрри) çĕнтерÿçĕсем пулчĕç.
Чи активлă хутшăнакансем — Тукай ял поселенийĕн территорийĕнче пурăнакансем. Ăмăртăва вĕсем 6-ăн килнĕ. Кунта, паллах, ял поселенийĕн пуçлăхĕн Ольга Андрееван тÿпи пысăк.
Тата çакна та палăртмалла. РФ Пенси фончĕн районти управленийĕн ĕçченĕсем (ертÿçи — Сергей Горбунов) спорт мероприятийĕнчен айккинче юлмарĕç. Вĕсем йĕлтĕр çине тăрса, лайăх çанталăкпа киленсе чун каниччен ярăнчĕç, кăмăл-туйăмне çĕклерĕç.
Çĕнтерÿçĕсем Хисеп грамотисене тата хаклă парнесене тивĕçрĕç.
В.Пундяков, çак ăмăртăва йĕркелекенĕ, спонсорла пулăшу панăшăн К.Мифтахутдинова тата С.Горбунова тав турĕ.
Источник: "Каçал Ен"