28 января 2012 г.
Пирĕн районта шашка вăййине кăмăллакансем сахал мар. Вĕсем республика шайĕнчи турнирсене те хутшăнса ăсталăхпа палăраççĕ. Çакăн пек çынсенчен пĕри вăл — Николай Индюков.
Нумаях пулмасть шашист Шупашкара черетлĕ ăмăртăва кайса килнĕ. Чăваш Ен кубокĕн турнирне 30 ытла спортсмен хутшăннă. Ăмăртăва çак вăййа юратакансем республикăри ял-хуларан çеç мар, Мускавран та килсе çитнĕ. Виçĕ куна тăсăлнă хĕрÿ тупăшура пĕрре çеç мар Чăваш Ен чемпионĕ ята илме тивĕçнĕ Шупашкар шашисчĕ Юрий Владимиров çĕнтерÿçĕ пулса тăнă. Пирĕн ентеш Н.Индюков республика чемпионĕсем хушшинче хăйне лайăх енчен кăтартнă, 6-мĕш вырăна тухса Чăваш Ен чемпионачĕн аслă лигине лекме пултарнă. Çапла вара, вăл ноябрь уйăхĕнче республика чемпионне палăртас тĕллевпе йĕркелекен турнирта Чăваш Енри чи вăйлă спортсменсемпе шашка хăми умĕнче вăй виçĕ.
Источник: "Каçал Ен"