25 января 2012 г.
Иртнĕ шăмат кун, январĕн 21-мĕшĕнче, Комсомольскинчи физкультурăпа спорт комплексĕнче пысăк спорт уявĕ пулчĕ. Кунта Тукай ялĕнче çуралса ÿснĕ, халĕ Мускав облаçĕнче пурăнакан ентешĕмĕре Петр Георгиевич Матросова чысласа ирĕклĕ майпа кĕрешекенсем кавир çинче вăй виçрĕç. Петр Георгиевичăн педагогика стажĕ 50 çул ытла, спортра тунă çитĕнĕвĕсем вара тата пуянрах. Вăл — çăмăл атлет, йĕлтĕрçĕ, боксер. Кавир çинче классика майĕпе кĕрешсе сакăр хутчен республика чемпионĕ пулнă. Районта кĕрешекенсен секцине йĕркелесе яраканĕ те вăлах. Унтанпа шăпах çур ĕмĕр иртрĕ.
Район администрацийĕн пуçлăхĕ Геннадий Волков пурне те спорт уявĕ ячĕпе ăшшăн саламларĕ, спортсменсене кавир çинчи тытăçусенче ăнăçу сунчĕ. Уйрăмах вăл кĕрешекенсен юхăмне пуçарса яракан ентеше пысăк тав сăмахĕ каларĕ. Малтанах секцие çÿреме пуçланă спорт ветеранĕсене те манса каймарĕ. Акă, Г.А. Индюков, Г.С.Краснов, В.Г.Дерягин, В.С.Краснов, Н.В.Краснов, Н.В.Смирнов, Н.В.Супов турнира хутшăнчĕç. Вĕсенчен кашнийĕ республикăри ăмăртусенче чемпион ятне пĕрре кăна мар çĕнсе илнĕ.
Петр Георгиевич районта çакăн пек турнир йĕркеленĕшĕн, хăйне чыс тунăшăн тав турĕ. Кĕскен 50 çул каяллахи вăхăтсене те аса илчĕ.
Нумай ăшă сăмах пулчĕ çак кун физкультурăпа спорт комплексĕнче. Чăваш Республикин ирĕклĕ майпа кĕрешекенсен федерацийĕн президенчĕ В.М.Семенов, Чăваш Патшалăх Канашĕн депутачĕ, «Газпром межрегионгаз Чебоксары» генеральнăй директорĕ К.С.Мифтахутдинов, «Кĕтне» ентешлĕх ертÿçи А.П.Капитонов, спорт ветеранĕсен ячĕпе темиçе хут республика чемпионĕ пулнă В.С.Краснов тухса калаçрĕç. Тукай ял поселенийĕн пуçлăхĕ О.П.Андреева вара: «Мухтанатпăр, мăнаçланатпăр эпир хамăр ентешĕмĕрпе, чăннипех те хисепе тивĕçлĕ çын пирĕн Петр Георгиевич»,— терĕ. Çавăнпах ĕнтĕ турнира килнĕ хăнасем ентеше асăнмалăх парнесем парса чысларĕç.
Çак кун кавир çине çĕре яхăн спортсмен тухрĕ. Кунта Патăрьел, Канаш районĕсен çамрăкĕсем те килнĕ. Сакăр виçере вăй виçрĕç кĕрешÿçĕсем. Чăн малтан хăйсен вăйне 42 килограмм таранхи виçеллисем тĕрĕслерĕç. Чи ăста кĕрешекенĕ вара Патăрьелĕнчен килнĕ А.Пугачев пулчĕ. Канаш районĕн спортсменĕ А.Сергеев иккĕмĕш, Асанкасси шкулĕнче вĕренекен Д.Яндров виççĕмĕш вырăнсене йышăнчĕç. 46 килограмм таранхи виçеллисем хушшинче В.Миронов (Комсомольски) çĕнтерчĕ. С.Григорьев (Аслă Чурачăк) иккĕмĕш призер пулса тăчĕ. В.Кошелев (Патăрьел) виççĕ-мĕш вырăна юлчĕ.
50 килограмм таранхи виçерисем хушшинче чи çивĕччи Д.Сергеев (Канаш) пулчĕ. А.Артемьевпа Е.Козлов (иккĕшĕ те Аслă Чурачăк) иккĕмĕшпе виççĕмĕш вырăнсене тивĕçрĕç.
Р.Козлов та Аслă Чурачăк шкулĕн командинчен. Вăл 54 килограмм таранхи виçере кĕрешсе чемпион лентине çĕнсе илчĕ. Унăн юлташĕ Ю.Степанов иккĕмĕш приз хуçи пулчĕ. А.Чашкин (Патăрьел) виççĕмĕш вырăн йышăнчĕ.
Малалла кавир çине 58 килограмм таранхи виçеллисем тухрĕç. Кунта чи пултарулли Комсомольски каччи Д.Малышев пулчĕ. Ăста кĕрешсе пĕрремĕш вырăна хăйĕн аллинчен ямарĕ. Урмаел спортсменĕ А.Текмеев Д.Малышева выляса ярса иккĕмĕш приза çĕнсе илчĕ. С.Тимофеев (Канаш) виççĕмĕш вырăна юлчĕ.
Тытăçусем çивĕчленсех пычĕç. 63 килограмм таранхи виçере кавир çине 8 спортсмен тухрĕ. Финалти тытăçăва Тукай Мишер каччипе Р.Айсынпа Канаш районĕнчен килнĕ С.Данилов тухрĕç. Иккĕшĕ те пысăк ăсталăхпа палăрчĕç. Çапах та Канаш районĕн каччи Ришата çĕнтерсе пĕрремĕш приза тивĕçрĕ, Тукай Мишер спортсменĕ иккĕмĕш вырăна юлчĕ. Патăрьелĕнчен килнĕ Ю.Петров виççĕмĕш приза çĕнсе илчĕ.
Турнира килнĕ 10 спортсмен 69 килограмм таранхи виçере вăй виçрĕ. И.Михайлов (Канаш) пысăк пултарулăхпа палăрчĕ, чемпион ятне тивĕçрĕ. Иккĕмĕш вырăна та Канаш районĕн спортсменĕ йышăнчĕ. Вăл — М.Парналес. Патăрьел районĕн командинчи А.Верликов виççĕмĕш вырăна юлчĕ.
Юлашки тытăçусем 76 килограмм таранхи виçеллисем хушшинче иртрĕç. Кунта Урмаел каччи Д.Пахалов чи ăста кĕрешнипе палăрчĕ. Вăл хăйĕн юлташне И.Хамдеева çĕнтерсе пĕрре-мĕш приза çĕнсе илчĕ. Ильфат финалти тытăçура иккĕмĕш вырăна тивĕçрĕ. Виççĕмĕш приз хуçи те Урмаел спортсменĕ Э.Жуков пулчĕ.
Турнир çĕнтерÿçисене медальсемпе, дипломсемпе, асăнмалăх парнесемпе хавхалантарчĕç. Унсăр пуçне уйрăм спортсменсене ятарлă парнесемпе те чысларĕç. Акă, С.Краснова 46 килограмм таранхи виçере кĕрешсе пĕрремĕш вырăн йышăннă В.Миронова (Комсомольски) çавăн пек парне парса саламларĕ.
Д.Малышев (Комсомольски) хăйĕн ăсталăхĕпе куракансен кăмăлне кайрĕ. Çавăншăн вăл турнирăн пĕчĕк кубокне тивĕçрĕ. Анат Тимĕрчкасси каччи Р.Козлов çĕнтерÿшĕн пысăк тăрăшулăх кăтартса пачĕ. Ăна та пĕчĕк кубокпа хавхалантарчĕç. Патăрьел районĕн командинчи А.Пугачев турнира килнĕ спортсменсем хушшинче чи çамрăкки пулчĕ. Ăна та ятарлă парнепе чысларĕç. В.Кошелев та (вăл та Патăрьелĕнчен) çавăн пек парнене тивĕçрĕ. Канаш районĕн спортсменĕ С.Данилов кавир çинче пысăк ăсталăх кăтартнипе палăрчĕ. Çавăншăн вăл ятарлă парнене тивĕçрĕ.
Çак турнира йĕркелекенсем ăна тивĕçлĕ шайра ирттерме спонсорла пулăшу панă Н.В. Смирнова, В.С.Краснова, Н.В. Краснова, Н.В.Супова, В.Г.Дерягина, В.Н.Степанова, Г.М.Долгова, Г.И.Гончарова, В.З.Долговăна, Б.В.Малова, В.К.Смирнова, В.А.Иванова, Г.В.Васильева, С.В.Горбунова, М.Р.Минатуллина, Ю.А.Гузьмина, И.К.Ямалетдинова, О.Н.Воробьева, А.Ф. Поргунова, М.Хайрутдинова пысăк тав сăмахĕ калаççĕ.
Районти искусство шкулне çÿрекен ачасем те спортсменсене хавхалантарса ташăсем кăтартрĕç.
Турнирти тытăçусене кавир çинчи судья Ирек Минсафинов тивĕçлĕ шайра йĕркелесе пычĕ.
Источник: "Каçал Ен"