21 января 2012 г.
Январĕн 18-мĕшĕнче Чăваш Енре, çав шутра Комсомольски районĕнче те, Пĕрлехи информаци кунĕ пулчĕ. Информкунăн тĕп темисем çаксем: 2012 çулхи мартăн 4-мĕшĕнче пулакан Россия Федерацийĕн Президенчĕн суйлавне хатĕрленсе ирттересси; Чăваш Республикин 2011 çулхи социаллă-экономикăлла аталанăвĕн малтанхи пĕтĕмлетĕвĕсем тата 2012 çул валли палăртнă задачăсем.
Пирĕн районăн информаци ушкăнĕн йышĕнче январь уйăхĕнчен улшăнусем пулнă. Информушкăна халь ЧР Патшалăх Канашĕн социаллă политика тата наци ыйтăвĕсен комитечĕн председателĕ Петр Краснов ертсе пырать. Ушкăн йышĕнче — «Чувашавтодор» АУО директорĕ Александр Волков, ЧР Патшалăх Канашĕн депутачĕ, «Газпром межрегионгаз Чебоксары» ООО генеральнăй директорĕ Кияметдин Мифтахутдинов,ЧР ĕçпе тивĕçтерекен патшалăх службин ертÿçин заместителĕ Татьяна Михайлова.
Ĕçе усăллăрах йĕркелес тесе информушкăн темиçе пая пайланса ĕçлерĕ, тĕрлĕ ял поселенийĕсенче пурăнакансемпе курса калаçрĕ.
Петр Красновпа район администрацийĕн пуçлăхĕ Геннадий Волков Шурут ял поселенийĕнче тĕл пулусем ирттерчĕç. Петр Степановичпа Геннадий Федорович малтанах «Урожай» колхоз председателĕпе Алексей Ершовпа хуçалăхăн иртнĕ çулхи социаллă-экономикăлла аталанăвĕн пĕтĕмлетĕвĕсене сÿтсе яврĕç. Çавăн пекех пĕтĕмĕшле практика врачĕн уйрăмĕн ĕç-хĕлĕпе кăсăкланчĕç, Шурутри ваттисен çуртĕнче пурăнакансемпе тĕл пулса калаçрĕç. П.Красновпа Г.Волков Тукай ял поселенийĕнче вырнаçнă «Рассвет» ял хуçалăх производство кооперативне те çитсе курчĕç. Тĕл пулусенче информкун темисене сÿтсе явнă май пиртен тата эпир мĕнле суйланинчен Раççей пуласлăхĕ нумай килнине уйрăммăн палăртнă.
ЧР Патшалăх Канашĕн депутачĕ, «Газпром межрегионгаз Чебоксары» ООО генеральнăй директорĕ Кияметдин Мифтахутдинов тата район администрацийĕн ял хуçалăх пайĕн тĕп агрономĕ Илдус Минетуллин Александровка ял поселенине çитсе курчĕç. Ял поселени пуçлăхĕ Валерий Волков вырăнти лару-тăрупа паллаштарчĕ, 2011 çулхи социаллă-экономикăлла кăтартусем çинче чарăнса тăчĕ, тунă ĕçсене пĕтĕмлетрĕ.
«Искра» колхоз председателĕ Александр Зайцев пĕлтĕр ял хуçалăх ĕçĕсем мĕнле пыни çинчен каласа пачĕ, выльăх-чĕрлĕх ĕрчетессинчи тата тыр пул, пахча çимĕç ÿстерсе сутассинчи кăтартусемпе паллаштарчĕ, ÿсĕмсемпе çитменлĕхсене палăртрĕ. Çавăн пекех пуçтарăннисем «Ĕç пуçлакан фермер» программăна сÿтсе яврĕç, унăн паха енĕсене тишкерчĕç.
Делегаци Хырай Ĕнел вăтам шкулне те çитсе курчĕ, вĕренÿ сферинчи йывăрлăхсене пăхса тухрĕ. К.Мифтахутдинов çывăх вăхăтрах шкула çĕнĕ спорт инвентарĕпе тивĕçтерме шантарчĕ.
Çавăн пекех информушкăнăн членĕсем ял халăхĕн ыйтăвĕсем çине хуравларĕç. Çынсене уйрăмах ялта клуб çукки, çавăнпа та çамрăксен канăвне тивĕçлĕ шайра йĕркелеме май пулманни, уявсенче пĕрле пуçтарăнса савăнма вырăн çукки пăшăрхантарни паллă пулчĕ. Вĕсен ыйтăвне шута илсе ун çине уйрăм тимлĕх уйăрма шантарчĕç.
Пĕрлехи информаци кунĕнче яваплă çынсем районти ялсенче граждансене харпăр хăй ыйтăвĕсемпе те йышăннă.
Источник: "Каçал Ен"