14 января 2012 г.
Январĕн 12-мĕшĕнче Пенси фончĕн районти управленийĕнче видеоконференци евĕр йĕркеленĕ «Раççей пенсионерĕсен союзĕн» регионаллă уйрăмĕн правленийĕн анлă ларăвĕ иртрĕ. Ăна союзăн Чăваш Енри уйрăмĕн председателĕ В.Сапожников ертсе пычĕ. Видеоконференцие районсенчи управленисен, советсен членĕсем, социаллă хÿтлĕх органĕсен, Пенси фончĕн районсемпе хуласенчи управленийĕсен представителĕсем, ветерансен, çамрăксен юхăмĕсен членĕсем, «Пĕрлĕхлĕ Раççей» парти çыннисем хутшăнчĕç.
Кун йĕркинче 2 ыйту пулчĕ: «Раççей пенсионерĕсен союзĕн» 2012 çул валли хатĕрленĕ ĕç планне сÿтсе явасси; Раççей Федерацийĕн Президенчĕн суйлавне хатĕрленес ĕçе хутшăнасси.
Чи малтанах В.Сапожников сăмах илчĕ, кăçал ирттермелли мероприятисен планĕпе паллаштарчĕ, ватăсемпе çамрăксем хушшинчи çыхăнăва çирĕплетмеллине палăртса хăварчĕ. Унтан Пенси фончĕн Чăваш Республикинчи уйрăмĕн управляющийĕ Р.Кондратьева Пенси фончĕн пĕлтĕрхи ĕç-хĕлне пăхса тухрĕ, ÿсĕмсене тишкерчĕ. Малалла Сывлăх сыхлавĕн тата социаллă аталанăвăн министерствин уйрăм начальникĕ Г.Рязанова Чăваш Республикин Президенчĕн указĕпе килĕ-шÿллĕн «Ĕç ветеранĕ» хисеплĕ ята парасси республикăра мĕнле пулса пыни çинчен каласа пачĕ, Пенси фончĕ социаллă хÿтлĕх органĕсемпе килĕштерсе ĕçлени хальхи вăхăтра питĕ пĕлтерĕшлĕ пулнине палăртса хăварчĕ. Çавăн пекех «Раççей пенсионерĕсен союзĕн» Çĕмĕрле, Комсомольски, Çĕрпÿ, Шăмăршă районĕсенчи уйрă-мĕсен представителĕсем вырăнти лару-тăрупа паллаштарчĕç, тĕрлĕ сĕнÿсем пачĕç. Пирĕн районтан нумаях пулмасть ветеран удостоверенине илме тивĕçнĕ Е.Белкова та сăмах илчĕ, çак хисеплĕ ята парса чысланăшăн хĕпĕртенине палăртрĕ, тав сăмахĕ каларĕ. Мероприятире çавăн пекех хисеплĕ хăнасем — ĕç ветеранĕ, Социализмлă Ĕç Геройĕ Е.Васильева, профсоюз тата парти органĕсен ветеранĕ К.Груздева та пулчĕç.
Источник: "Каçал Ен"