11 января 2012 г.
Волейбол вăййине кăмăллакансем йăлана кĕнĕ Раштав турнирне çулсеренех чăтăмсăррăн кĕтеççĕ. Халиччен вăл ытларах районти шкулсенче иртнĕ пулсан, кăçал «Кĕтне» физкультурăпа спорт комплексĕнче пулчĕ. Январĕн 8-мĕшĕнче кунта 13 команда килсе çитрĕ. 12-шĕ — хамăр районтан: александровкăсем, асанкассисем, нĕркеçсем, çĕнĕмăратсемпе шурутсем, аслăчурачăксемпе чĕчкенсем, урмаелсемпе тукаймишерсем, комсомольскисем (2 команда) тата хиртимăнтăрсем. Патăрьелĕнчи «Паттăр» ФСКран та волейболистсем килме кăмăл тунă. Командăсем йышлипе вĕсен пĕр пайĕ Комсомольски 2-мĕш шкулĕн спортзалĕнче вылярĕ.
Спорт уявне уçнă çĕре Комсомольски район администрацийĕн пуçлăхĕ Геннадий Волков, каçалсен «Кĕтне» ентешлĕхĕн председателĕ Александр Капитонов, ЧР Патшалăх Канашĕн депутачĕ, социаллă политика тата наци ыйтăвĕсен комитечĕн председателĕ Петр Краснов, «Мой город» проектпа конструктор бюровĕн гендиректорĕ Сергей Лукиянов, «Дуслык» АХО ертÿçи Кияметдин Пахалов, «Слава картофелю» агрофирма генеральнăй директорĕ Хасиятулла Идиатуллин тата ыттисем хутшăнчĕç, спортсменсене ăнăçу сунчĕç, куракансене вара вĕсене хавхалантарма ыйтрĕç.
Вăййа уçакансем асанкассисемпе чĕчкенсем пулчĕç. Пурте тăрăшса вылярĕç пулин те, «Чичканы» команда ытларах очко пухма пултарчĕ. Ытти ушкăнсенче те вăйăсем хĕрÿ иртрĕç. Финалта патăрьелсемпе чĕчкенсен 3–4-мĕш вырăнсемшĕн выляма тиврĕ, чĕчкенсем 4-мĕш вырăна юлчĕç, кÿршĕсем вара виççĕмĕш вырăн хуçисем пулса тăчĕç. Раштав турнирĕн Кубокĕшĕн нĕркеçсем тата шурутсем тупăшрĕç. Татăклă çак тытăçура «Нюргечи» команда хăй чи вăйлине, çивĕччине, çаврăнăçуллине тепĕр хут çирĕплетсе пачĕ, çĕнтерÿçĕ пулса тăчĕ. Кунта çеç мар, ытти турнирсенче те çĕнтерсе пыма волейболистсене темиçе çулта тачă туслашнă йыш май парать. Вун виçĕ команда хушшинче иккĕмĕш вырăн йышăнни шурутсемшĕн те пысăк çитĕнÿ.
Турнирта малти вырăнсене йышăннисене Геннадий Волковпа «Кĕтне» ФСК директорĕ Евгений Тихонов, Хасият Идиатуллин ăшшăн саламларĕç, Дипломсемпе парнесем пачĕç.
Асăннă спорт мероприятийĕ кăçалхипе 16-мĕш хут иртнĕ. Яланхиллех, унăн тĕп спонсорĕ «Çĕрулмие мухтав» агрофирма пулчĕ.
Сăмах май, «Кĕтне» ентешлĕх район çыннисем сывă пурнăç йĕркине тытса пыччăр, физкультурăпа, спортпа туслашчăр тесе чылай мероприяти йĕркелет. Спортсменсем волейбол площадкинче тупăшнă вăхăтра ентешлĕхĕн вырăна тухса ирттернĕ ларăвĕ пулчĕ. Унта хутшăннисем февраль уйăхĕн пуçламăшĕнче пирĕн тăрăхра çуралса ÿснĕ, халь Шупашкарти тĕрлĕ вĕренÿ заведенийĕсенче пĕлÿ пухакан çамрăксемпе волейбол тата футбол турнирĕсене ирттерме йышăнчĕç. Çавăн пекех хастар ентешĕмĕрсем — А.П.Капитонов, В.Н.Гордеев, К.З.Пахалов, С.В.Егоров, А.Н. Осипов, С.П.Лукиянов, Г.И. Гончаров, П.С.Краснов — Комсомольскинчи хоккей командине тумтир, спортинвентарь туянма спонсорла пулăшу панă. Кунсăр пуçне «Кĕтне» ентешлĕхĕн уявне февральте Шупашкар хулинче йĕркелеме палăртрĕç. Пĕлтерĕшлĕ тепĕр ыйту та çĕклерĕç ларура — «Комсомольски районĕн хисеплĕ гражданинĕ» хисеплĕ ята туса хурасси çинчен район депутачĕсен Пухăвне ыйтупа тухма йышăну турĕç.
Источник: "Каçал Ен"