31 декабря 2011 г.
Чÿк — раштав уйăхĕсенче пирĕн районта, ытти çĕрти пекех, шкул ачисем хушшинче тĕрлĕ предметсемпе олимпиадăсем иртрĕç. Ытлари кун вара православи культурин никĕсĕпе те «Русь Святая, храни веру православную» ятпа муниципаллă олимпиада иртрĕ. Çак олимпиадăн тĕп тĕллевĕ — ачасене православи культурине вĕрентсе ÿстересси, шкул ачисене патриотизмла воспитани парса тавра курăмне анлăлатасси. Унта хăйсен ирĕкĕпе Раççей Федерацийĕнчи вĕренÿ тытăмĕнчи вăтам пĕлÿ паракан учрежденисенчи вĕренекенсем хутшăнма пултарнă.
Олимпиада тăватă этапран тăрать: раштав уйăхĕнче шкулсенчи, уйăх вĕçĕнче муниципалитетсенчи, нарăсра регионри, пуш уйăхĕнче вара Мускавра финал пулать. Раштавăн 27-мĕшĕнче пирĕн районти шкулсенче вĕренекенсем олимпиадăн иккĕмĕш этапне пуçтарăнчĕç. Пиллĕкмĕш—вунпĕрмĕш классенче вĕренекен 61 ача тупăшура вăй виçрĕ. Олимпиада ыйтăвĕсем ытларах историпе çыхăннă, çавăнпа та унта хутшăнакан ачасене шкулсенче истори предметне вĕрентекенсем хатĕрленĕ. Пиллĕкмĕш класра хальхи вăхăтра православи культурин никĕсĕ ятарлă предмет пур, вĕсене учительсем ертсе пынă май олимпиадăна та хăйсемех хатĕрленĕ. Çак пысăк мероприятие районти вĕренÿ пайĕн методисчĕ В.Г.Петрова ертсе пычĕ.
Малти вырăнсене çак ачасем тухрĕç: пиллĕкмĕшсем хушшинче — Ксения Гришина (Комсомольски 1-мĕш), улттăмĕшсенчен — Анастасия Белкина (Нĕркеç вăтам), çиччĕмĕшсенчен — Эдуард Антонов (Александровка тĕп), саккăрмĕшсенчен — Павел Кутаркин (Комсомольски 1-мĕш), тăххăрмĕшсенчен — Станислав Калашников (Хырай Ĕнел вăтам), вуннăмĕшсенчен — Дмитрий Игонин (Комсомольски 1-мĕш), вун пĕрмĕшсенчен Анна Ярлыгина (Хырай Ĕнел вăтам). Хурнай ялĕнче пĕр çемьере çуралса ÿснĕ Комсомольски 2-мĕш вăтам шкулĕнче 11-мĕш класра вĕренекен Мария, Хырхĕрри тĕп шкулĕнче 7-мĕш класра пĕлÿ пухакан Максим Мининсем те çĕнтерÿçĕсенчен нумаях кая юлмарĕç, хăйсен тантăшĕсем хушшинче иккĕмĕш вырăна тухрĕç. 10—11-мĕш классенче вĕренекенсем хушшинче мала тухнă ачасем нарăс уйăхĕнче Шупашкарти регионти этапа хутшăнĕç.
Сăмах май, иртнĕ вĕренÿ çулĕнче пирĕн районти Дария Спиридонова (Комсомольски 1-мĕш вăтам шкулĕ, 11-мĕш класс) тата Анна Ярлыгина (Хырай Ĕнел вăтам шкулĕ, 10-мĕш класс) çак олимпиадăн республика шайĕнче ирттернĕ этапĕнче иккĕшĕ те виççĕмĕш вырăн йышăннăччĕ.
Олимпиадăна хутшăннă каш-ни вĕренекен сертификата, çĕнтерÿçĕсемпе призерсем дипломсене тивĕçрĕç. Çитес вăхăтрах вĕсене шкулсенче ачасене парĕç.
Источник: "Каçал Ен"