31 декабря 2011 г.
Çиелтен пăхсан, библиотекăра ĕçлекенсен ĕçĕ ытла куçа курăнсах каймасть. Хальхи вăхăтра чылайăшĕ телевизор, компьютер еннелле ытларах туртăнать.
Çынсем кĕнеке тĕнчипе — библиотекăпа — туслашчăр тесе ырми-канми тăрăшаççĕ те ĕнтĕ районти тĕп библиотека ĕçченĕсем.
Районти тĕп библиотека заведующийĕнче 2006 çултанпа Мария Мокеева ĕçлет. «Эпир çынсене кĕнекесем, хаçат-журнал вулаттарнипе кăна çырлахмастпăр»,— тет Мария Васильевна. Вулавăш çуртĕнче тĕрлĕрен кану каçĕсем, викторинăсемпе диспутсем ирттереççĕ. Кашни уяв тĕлне, паллă ăсчахсен юбилейĕсем ячĕпе кĕнеке выставкисем йĕркелеççĕ.
«Пирĕн пата тĕрлĕ ăрури çынсем килеççĕ. Кăçал, Космонавтика çулталăкне халалласа, тĕрлĕ мероприяти йĕркелерĕмĕр. Вĕсенчен пĕри вăл — «Свет далеких планет» кĕнеке выставки. Вулакансем космонавтсен пурнăçĕпе, уйрăмах пирĕн ентешĕмĕр А.Г.Николаев çинчен паллашрĕç», — терĕ Мария Васильевна.
Район çыннисем уйрăмах «Чăваш Енĕм — савнă ен» выставкăна ырлаççĕ. Унта килекенсем Чăваш Республикинчи паллă çынсемпе, вăрçă паттăрĕсемпе, халăх пултарулăхĕпе, чăваш халăх сăмахлăхĕпе, çар начальникĕсемпе, спортсменсемпе, чăвашсен эрешлĕ пир-авăрĕпе паллашрĕç.
Ача-пăча библиотекин ĕçченĕ Лилия Мингалиева та пултаруллă. Вунă çул ытла ĕçлет вăл вулавăшра. Лилия Фидаиловна шаннă ĕçе тÿрĕ кăмăлпа пурнăçлать. «Библиотекăна çÿрекен ача-пăча мĕн пĕчĕкрен ăслă-тăнлă, пуян тавра курăмлă çитĕнет. Кĕнекесемпе туслă пулни вĕсене нумай пулăшать»,— терĕ Л.Мингалиева.
Вулакансенчен чылайăшĕ библиотекăпа вуншар çул тачă çыхăну тытать.
«Районти тĕслĕхлĕ библиотека информаци, культура, вĕренÿ ыйтăвĕсемпе пурне те тивĕçтерекен центр пулса тăчĕ»,— пĕлтерчĕç Мария Васильевнăпа Лилия Фидаиловна.
«Çĕнĕ çултан мĕн кĕтетĕр?»— ыйтмасăр чăтаймарăм вулавăш çурчĕн ĕçченĕсенчен.
— Библиотека алăкĕ 2012 çулта та вулакансемшĕн яланах уçă пулĕ. Аçтаха çулталăкĕнче вулакансен шучĕ ÿсессе шанатпăр,— терĕç вĕсем.
Источник: "Каçал Ен"