28 декабря 2011 г.
Сергей Валерьевич Яковлев Çĕнĕ Кипеçре çуралса ÿснĕ. Тĕнче шайĕнчи спорт мастерĕ. Дуатлон (шывра ишесси, çăмăл атлетика) тата триатлон (шывра ишесси, çăмăл атлетика, велоспорт) енĕпе вăл чылай çитĕнÿ тăвать. 2007 çулта дуатлон енĕпе кубок çĕнсе илнĕ, икĕ хутчен Европа чемпионĕ пулнă. Тĕнче тата Европа кубокĕн этапĕсен призерĕсен шутне кĕнĕ. Дуатлонпа тата триатлонпа чемпионатсенче пĕрре мар çĕнтернĕ.
Декабрĕн 24-мĕшĕнче районти физкультурăпа спорт комплексĕнче шывра ишсе асăннă ентешĕн призĕсене çĕнсе илессишĕн хĕрÿ ăмăртусем иртрĕç. Унта шкулсен спортсменĕсем хутшăнчĕç. Ăмăртусене тивĕçлĕ шайра ирттерме ентешĕн аппăшĕ Надежда Валерьевна тата шăллĕ Александр Валерьевич килнĕ. Иккĕшĕ те — Чăваш Республикин триатлон федерацийĕн президиумĕн членĕсем. Çавăн пекех çак ăмăртусене Чăваш Республикин триатлон спорчĕн федерацийĕн вице-президенчĕ, физкультура ĕçĕн хисеплĕ ĕçченĕ, Чăваш Республикин хисеплĕ тренерĕ В.Г.Дмитриев та килнĕ.
1999—2001 çулсенче çуралнă хĕр ачасем хушшинче Комсомольски 1-мĕш вăтам шкулĕн спортсменки Мария Трофимова çĕнтерчĕ. Иккĕмĕшпе виççĕмĕш вырăнсене Гальяна Тазетдиновăпа Алина Абимова (иккĕшĕ те Комсомольски 2-мĕш вăтам шкулĕнчен) йышăнчĕç. Ку хĕр ачасем 25 метрлă дистанцире тупăшрĕç. Асăннă çулхи ар-çын ачасем те çак дистанцирех вăй виçрĕç. Кĕçĕн Çĕрпÿел вăтам шкулĕн çамрăкĕ Данил Макаров чемпион ятне тивĕçрĕ. Тукай Мишерĕнчен килнĕ Динар Шайхалов тата Артем Суратов (Комсомольски 2-мĕш вăтам шкулĕ) иккĕмĕшпе виççĕмĕш призерсем пулчĕç.
Унтан бассейнра 1997—1998 çулхи хĕр ачасем 25 метрлă дистанцире тупăшрĕç. Ирина Волкова (Александровка) пĕрремĕш приза çĕнсе илчĕ. Анна Алякина (Хирти Мăнтăр вăтам шкулĕ) иккĕмĕш, Татьяна Гордеева (Хирти Явăш) виççĕмĕш вырăнсене тухрĕç.
Çак çулсенчи арçын ачасем хушшинче (25 метр) Артем Алексеев (Кĕçĕн Çĕрпÿел) çĕнтерчĕ. Динар Зарипов (Тукай Мишер) иккĕмĕш, Максим Воробьев (Хырай Ĕнел) виççĕмĕш вырăнсене тивĕçрĕç.
1994—96 çулсенче çуралнă хĕр ачасем 50 метрлă дистанцире старта тухрĕç. Кунта Комсомольски 1-мĕш вăтам шкулĕн спортсменки Людмила Васильева пĕрремĕш вырăна аллинчен вĕçертмерĕ. Ольга Акчурина (Кĕçĕн Çĕрпÿел) иккĕмĕш призер пулса тăчĕ. Мария Кокшина (вăл та Комсомольски 1-мĕш вăтам шкулĕнчен) — виççĕмĕш приз хуçи.
Арçын ачасем те (аслăраххисем) 50 метрлă дистанцире ишрĕç. Ильнар Хаертдиновпа Рустем Азизов (иккĕшĕ те Урмаел шкулĕнчен) бассейнра пĕрремĕшпе иккĕмĕш кăтартусем турĕç. Алексей Данилов (Хирти Мăнтăр) виççĕмĕш вырăна тивĕçрĕ.
Спорт ветеранĕсем хушшинче ăмăртура Хирти Явăшран килнĕ Анатолий Давыдов çĕнтерÿçĕ ята тивĕçрĕ.
Шупашкартан килнĕ хăнасем çĕнтерÿçĕсене дипломсем, медальсем, асăнмалăх парнесем парса чысларĕç.
Источник: "Каçал Ен"