24 декабря 2011 г.
Райпо системинчи лавккасен ĕçне пурнăç таппипе килĕшÿллĕн йĕркелесе пыраççĕ, тултан та, шалтан та сăн кĕртеççĕ. Районти чылай магазинăн сăн-сăпатне улăштарчĕç. Паянхи кун Тăманлă Выçлири халăха куллен кирлĕ таварпа тивĕçтерекен магазинта юсав ĕçĕсем пыраççĕ.
Пуринпе те пĕр чĕлхе тупма тăрăшать кунта заведующинче ĕçлекен Валентина Киргизова. Ертÿçĕ «тилхепине» вăл 1995 çултанпа тытать. Хăйĕн ĕçне парăннă çын уйăхсерен плансене тултарассишĕн чунтан-вартан тăрăшать.
В.Киргизова Вутлан ялĕнче çуралса ÿснĕ. Мĕн пĕчĕкрен сутуçă пулма ĕмĕтленнĕ хĕр.
Тăманлă Выçли вăтам шкулĕнчен вĕренсе тухсан Шупашкарти коопераци техникумĕнче пĕлÿ пухнă хыççăн, «Элара» заводра 8 çул операторта ĕçленĕ.
1988 çулта Вутлан каччипе, Юрий Киргизовпа, çемье çавăраççĕ. Шăкăл-шăкăл 20 çул ытла пурăнса 3 хĕр çуратаççĕ.
Олеся, аслă пĕлÿллĕскер, мăшăрĕпе тĕп хуламăрта пурăнать. Оксана — Чăваш патшалăх университечĕн 4-мĕш курс студенчĕ. Ирина улттăмĕш класра вĕренет, медицина ĕçченĕ пулма ĕмĕтленет.
Картиш тулли выльăх-чĕрлĕх тытаççĕ Киргизовсем. Ÿркенмеççĕ вĕсем, тем тĕрлĕ пахча-çимĕç лартса ÿстереççĕ, хĕл валли те тĕп сакай тулли хатĕрленĕ. Аш-какай та пасартан илмеççĕ.
«Мĕнле ĕлкĕретĕр пурне те?» — тесе ыйтрăм суту-илÿ ĕçченĕнчен.
— Наянлансан ним те пулмасть, паллах. Ÿркенмелле мар кăна, ялта хуларинчен лайăх пурăнма. Мăшăр килти пур ĕçе те тума пулăшать,— терĕ Валентина Владимировна.
Юратнă ĕçе кăмăлпа килет вăл. Тавар туянакансем ун пирки ырăпа кăна калаççĕ.
Источник: "Каçал Ен"