10 декабря 2011 г.
Раштавăн 6-мĕшĕнче районти культурăпа кану центрĕнче Донор кунĕ иртнĕ. Ăна районти тĕп больница ĕçченĕсем йĕркеленĕ. Çак кун пархатарлă ĕçе 85 çын хутшăнса юн панă. Вĕсем хушшинче — Раççей Федерацийĕн тава тивĕçлĕ донорĕ Агния Мударисова. Сăмах май, Донор кунĕнче Агния Семеновна 47-мĕш хут юн панă. Валерий Кольцов вара çак пархатарлă ĕçе 40-мĕш хут хутшăннă.
«Чи активлисем районти тĕп больница ĕçченĕсем пулчĕç — 20-ĕн. Шалти ĕçсен пайĕнчен — 9-ăн, районти налук службин инспекцийĕнчен — 9-ăн»,— терĕ Надежда Михайлова врач инфекционист Донор кунне пĕтĕмлетсе.
Пĕрремĕш хут донорсен ретне тăракансем — Дмитрий Хлебников, Оксана Муравьева, Вера Калашникова, Надежда Соколова, Светлана Кокшина, Зиля Кудряшова (пурте районти налук службин инспекцийĕнчен) тата Юрий Порфирьев полици сотрудникĕ.
Шурă халатлă ĕçченсем районти культурăпа кану центрĕн директорне Сергей Журавлева Донор кунне йĕркелеме пулăшнăшăн тав тунă.
Источник: "Каçал Ен"