07 декабря 2011 г.
Районта, республикăра тĕрлĕ спорт ăмăртăвĕсем иртеççĕ, вĕсене тĕнчере палăрнă çынсем ячĕпе йĕркелеççĕ. Акă Совет Союзĕн Геройĕ, Асанкассинче çуралса ÿснĕ ентеш Ф.Н.Чернов ячĕпе декабрĕн 3-мĕшĕнче Комсомольскинче ирĕклĕ майпа кĕрешекенсен республикăри турнирĕ пулчĕ. Ăна вĕренекенсене сывă пурнăç йĕркине явăçтарас, спорта хăнăхтарас тĕллевпе йĕркелерĕç. Кăçал вăл 22-мĕш хут иртрĕ.
Ăмăртăва Аслă Чурачăк, Анат Тимĕрчкасси, Асанкасси, Çĕнĕ Мăрат, Урмаел, Комсомольски, Тукай Мишер вăтам шкулĕсенче пĕлÿ пухакан ачасем хутшăнчĕç. Унсăр пуçне Канаш, Йĕпреç, Патăрьел районĕсенчи тата Канаш хулинчи 100 ытла спортсмен килсе çитрĕ.
Кĕрешÿ кавирĕ çине шăпа туртса пĕрин хыççăн тепри тухса 30, 32, 35, 38, 42, 46 килограмлă виçеллисем (1998 —1999 çулсенче çуралнисем), 50, 54, 58, 63, 69 килограмлисем (1995—1996 çулсенче çуралнисем) вăй виçрĕç.
Мероприятие Чăваш Республикин физкультура, спорт тата туризм министрĕн çумĕ Алексей Яковлев, район администрацийĕн пуçлăхĕ Геннадий Волков, Чăваш Республикин Патшалăх Канашĕн депутачĕ, «Газпром межрегионгаз Чебоксары» ООО генеральнăй директорĕ Кияметдин Мифтахутдинов, федераллă патшалăх статистикин Чăваш Енри территориллĕ органĕн ертÿçин çумĕ Петр Краснов, «АСК» ОООн директорсен совечĕн председателĕ Александр Капитонов, Асанкасси ял поселенийĕн пуçлăхĕ Николай Карпов тата ыттисем те хутшăнчĕç.
Ăмăрту пуçланиччен культура тытăмĕн ĕçченĕ Елена Маштанова пухăннисене юрăсем парнелерĕ.
Хĕрÿ кĕрешÿсенче 30 килограмлисем хушшинче Дмитрий Андреев (Анат Ти-мĕрчкасси) — пĕрремĕш, Алексей Алексеев (Йĕпреç) — иккĕмĕш, Станислав Пыркин (Асанкасси) — виççĕмĕш, 32 килограмлисем хушшинче Константин Калашников (Асанкасси) — пĕрремĕш, Александр Кушников (Патăрьел) — иккĕмĕш, Никита Коннов (Йĕпреç) виççĕмĕш вырăнсене йышăнчĕç. 35 килограмлă пăхаттирсенчен Алексей Сакмаров (Анат Тимĕрчкасси) чи маттурри пулнине çирĕплетрĕ. Николай Шапкин (Патăрьел) — иккĕмĕш, Евгений Арефьев (Канаш) виççĕмĕш пулчĕç. 38 килограмм виçеллĕ спортсменсенчен Геннадий Георгиев — пĕрремĕш, Владимир Иванов (иккĕшĕ те Канаш районĕнчен) — иккĕмĕш, Степан Челябин (Асанкасси) виççĕмĕш вырăнсене йышăнчĕç. 42-пе 46 килограмлă кĕрешÿçĕсенчен Стани-слав Григорьевпа (Аслă Чурачăк) Андрей Федоров (Канаш) — пĕрремĕш, Дмитрий Яндровпа Геннадий Школьников (Асанкассисем) — иккĕмĕш, Антон Филипповпа (Йĕпреç) Данил Данилов (Канаш) виççĕмĕш вырăнсене тивĕçрĕç. Тупăшăва малалла аслăрах классенче вĕренекенсем тăсрĕç. 50-па 54 килограмм виçеллĕ спортсменсенчен Евгений Козловпа Роман Козлов (иккĕшĕ те Анат Тимĕрчкасси каччисем) — пĕрремĕш, Николай Алякинпа (Патăрьел) Юрий Степанов (Анат Тимĕрчкасси) — иккĕмĕш, Никита Федоровпа (Йĕпреç) Андрей Артемьев (Анат Тимĕрчкасси) виççĕмĕш вырăнсене çĕнсе илчĕç.
58 килограмлисенчен Алексей Андреев (Çĕнĕ Мăрат) чи маттурри пулнине çирĕплетрĕ. Иккĕмĕшпе виççĕмĕш вырăнсене Сергей Тимофеевпа (Канаш) Иван Самуков (Комсомольски) çĕнсе илчĕç. 63 килограмлă спортсменсем хушшинче те хĕрÿ тупăшу пулчĕ. Пĕрремĕшпе иккĕмĕш вырăнсене Канаш районĕн пăхаттирĕсем Сергей Даниловпа Александр Васильев тивĕçрĕç. Виççĕмĕш вырăна Йĕпреç тăрăхĕнчен килнĕ Евгений Михеев тухрĕ.
Йывăр виçеллисенчен (69 кг) Игорь Михайлов (Канаш) — пĕрремĕш, Петр Игнатьев (Çĕнĕ Мăрат) — иккĕмĕш, Игорь Калашников (Асанкасси) виççĕмĕш вырăнсене çĕнсе илчĕç. Çĕнтерÿçĕсене Хисеп грамотисем, хаклă парнесем парса чысларĕç.
«Чи лайăх кĕрешÿçĕ» ята Константин Калашников (Асанкасси) тата Юрий Степанов (Анат Тимĕрчкасси) тивĕçрĕç. «За волю к победе» номинацире Владимир Орешкина та (Комсомольски) Хисеп грамотипе чысларĕç.
Ăмăрту хыççăн ФСК директорĕпе Евгений Тихоновпа курса калаçрăм. «Ирĕклĕ майпа кĕрешекенсен турнирĕ чăннипех пысăк шайра иртрĕ. Шел, хĕрсем хушшинче кĕрешÿ кавирĕ çине тухса вăй виçекен пулмарĕ. Вĕсем хăйсен хăватне кăтартсан илемлĕрех пулĕччĕ. Паянхи турнирпа эпĕ кăмăллă. Кĕрешÿçĕсенчен 14-шĕ малти вырăнсене çĕнсе илни çĕнтерÿçĕсен пьедесталĕ çине хăпарма тивĕçрĕç. Кунта, паллах, тренерсен тÿпи пысăк»,— терĕ Евгений Аркадьевич ăмăртăва пĕтĕмлетсе.
Источник: "Каçал Ен"