03 декабря 2011 г.
Районти халăха ĕçпе тивĕçтерекен центрăн «Кадр службисен ертÿçисен клубĕн» черетлĕ ларăвĕ иртнĕ. Унта ĕçпе тивĕçтерекен центрăн сотрудникĕсем кăна мар, предприятисенчи кадр службисен представителĕсем те хутшăннă. Тĕп ыйту — «Раççей Федерацийĕнче халăха ĕçпе тивĕçтересси çинчен» саккуна мĕнле пăхăннине тишкересси. Ĕç паракансем халăха ĕçпе тивĕçтерекен центра сотрудниксен шутне чакарма палăртни çинчен вăхăтра пĕлтернине, предприятире тулли мар ĕç кунĕ кĕртнине, инвалидсене ĕçе илнине тĕрĕслесси çине уйрăм тимлĕх уйăрнă.
Паянхи кун çивĕч тăракан ыйтусенчен пĕри — халăха ĕçпе ти-вĕçтернĕ çĕрте электронлă майпа усă курни. И.Мурзаева инспектор ĕç паракансен компьютер урлă ĕçченсене епле суйлама пулни çинчен каласа пачĕ.
Н.Дряблова ĕçсĕррисене профессилле пĕлÿ парасси, квалификацине ÿстересси çинчен калакан çĕнĕ административлă регламент çинче чарăнса тăчĕ.
Çавăн пекех центрăн директорĕ Г.Воронова 2011 çулта Чăваш Республикинче ĕçсĕррисен шутне чакарас тĕллевпе иртекен республика программи мĕнле пурнăçа кĕнине тишкерчĕ. Ĕç паракансен, центрăн тивĕçĕ — çак программăна туллин пурнăçласси.
Тĕл пулу ĕç паракансене халăха ĕçпе тивĕçтерекен центрпа килĕштерсе ĕçлени, ваканси банкне тултарни пĕлтерĕшлĕ пулнине кăтартса пачĕ.
Источник: "Каçал Ен"