30 ноября 2011 г.
Мал ĕмĕтлĕ çын шухăшсăр, ĕмĕтсĕр пурăнмасть. Ырă ĕçĕпе хисепе тивĕçет вăл. Ыттисене те тĕслĕх кăтартать. Сăмахăм – хастар çамрăк Алексей Ложков пирки.
А.Ложков Шурут-Нурăс ялĕнче çуралса ÿснĕ. Шурут вăтам шкулĕнчен вĕренсе тухсан Шупашкарти 19-мĕш номерлĕ професси паракан училищĕне çул тытнă, сварщик специальноçне алла илнĕ. Унтан вĕренсе тухсан темиçе çул ытти регионсене ĕçлеме çÿренĕ. Виççĕмĕш çул ĕнтĕ Алексей «Урожай» колхозра скотникре ĕçлет.
Ялта тĕпленес кăмăллă çамрăксем пур пулин те паян ун пеккисем нумай тесе калаймăн. Тăрăшуллă çамрăксем пурришĕн чун хĕпĕртет. Вăл 25-рех тăван килтен уйрăлса тухса çĕнĕ çурт лартнă. Мăшăрĕпе пĕр ача ÿстереççĕ.
«Ялта пурăнма килĕшет мана, çавăнпа тăван кĕтесех килме кăмăл турăм. Çак ĕçе суйланишĕн пĕр ÿкĕнÿ те çук»,— терĕ çамрăк, мĕн пĕчĕкрен хăй çитĕннĕ тăрăха, ял пурнăçне юратнăскер.
Унăн ашшĕпе амăшĕ, Геннадипе Валентина, чылай çул колхозра тăрăшаççĕ. Алешăна ачаранах хăйсемпе пĕрле фермăри ĕçе хăнăхтарнă. Çавăнпа та-и тен, каччăшăн çак ĕç пĕрре те йывăр пулман.
Хисеплеççĕ коллективра çамрăка. Йывăр вăхăтра сĕнÿ-канашпа та пулăшаççĕ ăна. «Урожай» колхозăн сĕт-çу фермин заведующийĕ Лидия Немцева та мухтать А.Ложкова. «Пысăк ĕмĕтпе, шанăçпа, ĕçлес туртăмпа тăрăшать вăл. Алексей пеккисене маттур тесе калас килет»,— тет ертÿçĕ ун пирки.
— Мĕн кирлĕ тата çынна пурнăçра; Пÿрт лартнă, ĕç пур, шалăвĕ те çителĕклĕ. Çурт тулли ача-пăча сасси пирки кăна ĕмĕтленетĕп. Телей вăл — ĕçпе çемье çыхăнăвĕнче,— терĕ Алексей.
Источник: "Каçал Ен"