23 ноября 2011 г.
Чÿк уйăхĕн 14-мĕшĕнче районти модельлĕ тĕп библиотекăра Чăваш Республикин тава тивĕçлĕ художникĕн, К.Иванов ячĕллĕ патшалăх премийĕн лауреачĕн Виктор Немцевăн ÿкерчĕкĕсен куравĕ уçăлчĕ. Çак кун библиотекăна шкул ачисем, пенсионерсем тата ыттисем те пухăнчĕç. Виктор Леонтьевич 1936 çулта Вутланра çуралнă. Ачалăхĕ ун Йĕпреç районĕнче иртнĕ. Пулас художник Йĕпреçре вăтам шкул пĕтернĕ хыççăн Шупашкарти художество училищине вĕренме кĕрет, алла диплом илет. В.Немцев ачаранах акробатикăпа кăсăкланнă. 1965 çулта спорт мастерĕн нормативне пурнăçланă. Икĕ çултан ăна СССР Художникĕсен союзне илеççĕ. Виктор Леонтьевича халăх театрĕ те илĕртет. Чылай спектакльте рольсене вылянă вăл. Çав хушăрах Чăваш патшалăх педагогика институчĕн художествăпа графика факультетĕнче вĕренсе пĕлÿ илнĕ.
Пултарулăх анинчи пысăк çитĕнÿсемшĕн вăл 1976 çулта «Чăваш Республикин тава тивĕçлĕ художникĕ» ята тивĕçнĕ, 1980 çулта К.Иванов ячĕллĕ патшалăх премийĕн лауреачĕ пулса тăнă.
Мероприятие район администрацийĕн культура секторĕн пуçлăхĕ Василий Васильев ертсе пычĕ.
В.Немцев пухăннисене хăйĕн пурнăçĕпе паллаштарчĕ, ыйтусем çине хуравларĕ. Каярахпа тĕп хуларан килнĕ ытти хăнасем те сăмах тухса каларĕç.
Источник: "Каçал Ен"