23 ноября 2011 г.
Нумаях пулмасть район администраци çурчĕн ларусен залĕнче çамрăксен пĕрлĕхлĕ информаци кунĕ иртрĕ. Ăна «Çамрăксен право культурине тата электораллă активлăхне ÿстересси» темăпа йĕркелерĕç. Унта 18—30 çулсенчи, вĕренÿ, культура, сывлăх сыхлавĕн учрежденийĕсенче, ял хуçалăхĕнче ĕçлекенсем, çамрăксен суйлав комиссийĕсен, участок суйлав комиссийĕсен членĕсем, ĕçлекен çамрăксен канашĕн, çамрăксен обществăлла пĕрлешĕвĕсен представителĕсем тата ыттисем те хутшăнчĕç.
Чи малтанах Комсомольски территори суйлав комиссийĕн секретарĕ Н.Розова сăмах илчĕ, пуçтарăннисене çывхаракан суйлавсем çинчен кĕскен каласа пачĕ, ыйтусем сиксе тухсан ăçта пырса тивĕçлĕ хурав илме пултарнине пĕлтерчĕ.
Унтан Чăваш Республикинчи Патшалăх статистикин федераллă службин ертÿçин çумĕ П.Краснов тата райадминистрацин организаци ĕçĕн уйрăмĕн начальникĕ Ю.Скворцов тухса калаçрĕç. Калаçăва диалог евĕр йĕркеленĕрен çамрăксем тунсăхласа лармарĕç, хăйсене пăшăрхантаракан ыйтусене пачĕç. П.Краснов Чăваш Республикин 2011 çулхи социаллă-экономикăлла аталанăвне тишкерчĕ, Комсомольски районĕ чи ăнăçлă ĕçлекен районсенчен пĕри пулнине çирĕплетрĕ.
Пуçтарăннисене уйрăмах ача сачĕсем çитменни пăшăрхантарчĕ. 2014 çулччен садиксенче ачасем валли çителĕклĕ вырăн тума планлаççĕ. 145 вырăнлă çĕнĕ ача сачĕ Комсомольскинче çывăх çулсенче ĕçлеме пуçлĕ. Çапах ку процеса хăвăртлатма та пулни çинчен палăртса хăварчĕç.
Çавăн пекех çамрăксем сывлăх сыхлавĕн системине модернизацилес ыйтăва хускатрĕç, унти çĕнĕлĕхсене тишкерчĕç.
«Çамрăк çемье» программăна та сÿтсе явмасăр хăвармарĕç пуçтарăннисем. Районти капиталлă строительство пайĕн специалисчĕ В.Хораськина программа мĕнле ĕçленипе, унăн уйрăмлăхĕсемпе паллаштарчĕ.
Юлашкинчен районти çамрăксен суйлав комиссийĕн председателĕн çумĕ Г.Гадельянова тата секретарĕ Т.Миговорова яшсемпе хĕрсене суйлава активлă хутшăнма чĕнсе каларĕç. Çамрăксен электораллă пĕлĕвне ÿстерме 9—11-мĕш классен хушшинче «Эпĕ тата суйлав» ятпа сочиненисен конкурсĕ ирттерессе пĕлтерчĕç.
Источник: "Каçал Ен"