23 ноября 2011 г.
Ноябрĕн 19-мĕшĕнче Çĕнĕ Шупашкар хулин бассейнĕнче акватлон енĕпе Чăваш Республикинче мала тухассишĕн чемпионат иртнĕ. Акватлон программине 2 километр çуран чупассине, шывра 200 метр ишессине кĕртнĕ. Çакнашкал ăмăртăва пирĕн спортсменсем пуçласа хутшăннă. Район чысне Урмаел вăтам шкулĕн вĕренекенĕсем Р.Азизов, И.Хаертдинов, Э.Тазетдинова тата Р.Юмакова хÿтĕленĕ. Хĕрсем хушшинчи хĕрÿ кĕрешÿре Э.Тазетдинова Чăваш Республикин чемпионĕ пулса тăнă. Яллă районсенчи командăсен тупăшăвĕнче вара Эльвира финиша иккĕмĕш, Рине виççĕмĕш çитнĕ. Яшсем хушшинче И.Хаертдинов палăрма пултарнă, вăл виççĕмĕш вырăна тивĕçнĕ.
Каларăм ĕнтĕ, ку спорт енĕпе пирĕн район спортсменĕсем халиччен ниçта та хутшăнман. Урмаел вăтам шкулĕн вĕренекенĕсем Н.Сахров тренер ертсе пынипе çак ăмăртуччен малтан, кĕркуннехи каникул вăхăтĕнче, Çĕнĕ Шупашкарти Олимп резервĕсен училищинче хатĕрленчĕç. Куратпăр, ачасемпе учителĕн çине тăрса ĕçлени сая каймарĕ. Вĕсене малашне те спортра çĕнĕрен çĕнĕ çитĕнÿсем тума сунатпăр.
Источник: "Каçал Ен"