16 ноября 2011 г.
Иртнĕ кунсенче Раççейри Шалти ĕçсен министерствин муниципалитетсем хушшинчи «Комсомольский» пайĕн ĕçченĕсем районти культурăпа кану центрне пуçтарăнчĕç. Савăнăçлă мероприятие шалти ĕçсен органĕн сотрудникĕн кунне халалларĕç.
Чи малтанах пухăннисем умĕнче пай начальникĕ, полици подполковникĕ Геннадий Кокшин доклад турĕ. Каярахпа вара Геннадий Николаевич Чăваш Республикин шалти ĕçсен министрĕн приказĕсене вуласа пачĕ. Вĕсемпе килĕшÿллĕн преступноçпа кĕрешес ĕçре çитĕнÿ тунисем наградăсене тивĕçрĕç. «Чи лайăх следователь» ята юстици капитанĕ Алексей Свинин тивĕçрĕ. Инна Аполонова аслă лейтенанта «За верность долгу» паллăпа наградăларĕç. Çавăн пекех тăрăшуллă сотрудниксене Хисеп грамотисем тата Тав хучĕсем парса хавхалантарчĕç. Вĕсем: Эдуард Никонов майор, Алексей Алексеев капитан, Андрей Марин аслă лейтенант, Алексей Карсаковпа Юрий Порфирьев прапорщиксем.
Савăнăçлă лару-тăрура полици начальникĕ I, II тата III степеньлĕ «Службăра палăрнăшăн» медальсемпе чысларĕ. Вĕсемпе кашни çулах шалти ĕçсен пайĕнче 20, 15 тата 10 çул ĕçлекенсене наградăлаççĕ. Медальсене илме кăçал Алексей Ефремов полици капитанĕ, Галина Зайцевăпа Андрей Адюков полици аслă лейтенанчĕсем, Алексей Соловьев прапорщикпа Николай Мефодьев старшина, Алексей Артемьевпа Владимир Лапшин аслă сержантсем тивĕçрĕç.
Пенсионерсен тата ветерансен ячĕпе Петр Лапшинпа Мария Илларионова сăмах тухса каларĕç.
Зала пухăннисене Рева Жукова, Светлана Никифорова, Инна Аполонова тата Ильшат Сиразетдинов юрăсемпе савăк кăмăл парнелерĕç. Çавăн пекех районти ача-пăча искусство шкулĕн «Островок» ушкăнĕ (ертÿçи Татьяна Иванова) те концерта хутшăнчĕ, илемлĕ ташăсемпе куракансене тыткăнларĕ.
Источник: "Каçал Ен"