03 ноября 2011 г.
Çĕр улмине «иккĕмĕш çă-кăр» тесе ахальтен каламаççĕ. Унран пĕçернĕ апат яланах пирĕн сĕтел çинче вырăн тупать. Ăна яшкана та яратпăр, хăйне кăна та пĕçерсе çиетпĕр, тĕрлĕ салат, кукăль-икерчĕ янтăланă çĕре те хушатпăр. Çăкăрпа çĕр улми пулсан выçса вилместпĕр, тенĕ ĕлĕкех ватăсем. Çакă та çĕр улмин кулленхи пурнăçри пысăк пĕлтерĕшне çирĕплетет.
Пирĕн район республикăра çак пахча çимĕçе пысăк лаптăкра туса илнипе палăрать. Çавăнпа та пирĕн тăрăхра çĕр улмине ÿстерекенсем кăна мар, унран тĕрлĕ çурма фабрикат тăвакан предприятисем пурринчен ним тĕлĕнмелли те çук. Вĕсенчен пĕри вăл — «Тав» ООО. Кунта çĕр улмине вĕтĕ тăрăхла касăксем çине ваклаççĕ, çĕнĕ технологисемпе усă курса типĕтеççĕ. Пурĕ 50 çын вăй хурать организацире. Ĕç йĕркине автоматизациленĕ пирки ĕçлекен çын нумай кирлĕ мар, çĕр улмине типĕтес процесăн ытларах пайне машинăсем пурнăçлаççĕ. Вĕсен ĕçне операторсем, технологсем йĕркелесе тăраççĕ. Кунта илсе килекен çимĕçе чи малтанах çăваççĕ, тасатаççĕ, хуппине сĕвеççĕ, унтан вĕтĕ турамсене вакласа типĕтеççĕ. «Нимĕнле химипе те усă курмастпăр. Çĕр улмирен ытлашши шыва çеç кăларатпăр»,— палăртать организацин генеральнăй директорĕн çумĕ В.П.Ермилов.
Хальхи вăхăтра «Тав» ООО районти ял хуçалăх производство кооперативĕсенчен, фермер хуçалăхĕсенчен «иккĕмĕш çăкăра» туянать. Шултрине пĕр хакпа, вĕттине тепĕр хакпа йышăнать организаци. Маларах вара, хуçалăхпа килĕшÿ алă пусиччен, продукцие тишкерет, хак парать, мĕншĕн тесен пĕтĕм çĕр улмине производствăна яма çук: ытла вĕттисем, касăккисем, паллах, юрăхсăр.
«Паянхи кун пахча çимĕç япăх сутăнать. «Иккĕмĕш çăкăра» илекенсем сахал. Çавăнпа та районти хуçалăхсене пулăшас тĕллевпе çĕр улмине вĕсенчен туянма тăрăшатпăр»,— пĕлтерет Владимир Петрович. «Победа» ял хуçалăх кооперативĕ тата Хайретдинов фермер хуçалăхĕ уйрăмах нумай çĕр улми турттарса килнине палăртать вăл. «Хатĕр продукцие Чăваш Енре мар, урăх регионсенче вырнаçтаратпăр. Уйрăмах Питĕрпе, Мускавпа килĕштерсе ĕçлетпĕр»,— вĕçлет сăмахне В.П.Ермилов.
Источник: "Каçал Ен"