29 октября 2011 г.
Нумаях пулмасть Çĕнĕ Шупашкар хулинчи ачасен пултарулăхне аталантаракан центрта усрав çемьесен республикăри слечĕ иртнĕ. Асăннă мероприятие усрав çемьесенчи хутшăнусене çирĕплетес, тăлăх тата ашшĕ-амăшĕсен тимлĕхĕсĕр юлнă ачасене граждансем тимлĕх уйăрччăр тесе йĕркеленĕ.
Слета усрав çемьесем пĕтĕм республикипех пуçтарăннă. Кашни çемье стена хаçачĕсем кăларса, фотоальбомсем, презентацисем туса хăйсен визит карточкине хатĕрленĕ. Пуçтарăннисене Чăваш Республикин вĕренÿ тата çамрăксен политикин министрĕн çумĕ Светлана Петрова, ача прависене хÿтĕлекен уполномоченнăй Александр Андреев, Çĕнĕ Шупашкар хулин пуçлăхĕ Олег Матвеев саламланă.
Çав кун программине «Усрав çемье — спортпа туслă çемье» спорт вăййисене, психологи тренингне, ÿнер мастерскойĕн ĕçне тата ыттине кĕртнĕ. Уява йĕркелекенсем ал ĕçĕсен куравĕпе, СССР летчик космонавчĕн Андриян Николаевăн Шуршăлти мемориал комплексĕпе, «Астăвăм» музейпе те паллашма май туса панă.
Пирĕн районтан слета Комсомольскинче пурăнакан Носовсен 5 çынран тăракан çемйи хутшăннă. Ларисăпа Владимирăн хăйсен икĕ ача — хĕрпе ывăл — çитĕнет, 2010 çулта вара вĕсем 10 уйăхри хĕр пĕрчине усрава илнĕ. Спорт ăмăртăвĕсенче Носовсен çемйи иккĕмĕш вырăн йышăннă, медале, хаклă парнесене тивĕçнĕ.
Источник: "Каçал Ен"