22 октября 2011 г.
Чăваш Енре, Комсомольски районĕнче октябрĕн 19-мĕшĕнче пулнă Пĕрлехи информаци кунĕн йĕркине икĕ тĕп тема кĕртнĕ. Ĕç коллективĕсемпе иртнĕ тĕл пулусенче «Республика халăхне социаллă пулăшу памалли хушма мерăсем» тата «Ял хуçалăх ĕçĕсем мĕнле пыни» ыйтусене сÿтсе явнă.
Пирĕн района Пĕрлехи информкуна ирттерме 5 çынран тăракан ĕçлĕ ушкăн çитрĕ. Шупашкартан килнĕ хăнасем темиçе ушкăна пайланса ял поселенийĕсене çул тытрĕç.
Район администрацийĕн пуçлăхĕпе Геннадий Волковпа федераллă патшалăх статистикин Чăваш Енри территориллĕ органĕн ертÿçин çумĕ Петр Краснов тата ЧР спорт, физкультурăпа туризм министрĕн заместителĕ Алексей Яковлев Шурут ял поселенине çитрĕç. Çак тăрăхри «Урожай» колхоза, «Победа» кооператива çитсе ĕç коллективĕсемпе тĕл пулма ĕлкĕрчĕç вĕсем. Икĕ хуçалăхĕнче те пикенсех çĕр улми кăлараççĕ. «Урожайра» ку ĕçе ятарлă комбайнсемпе пурнăçлаççĕ пулсан, йÿçшăхальсене пулăшма район администрацийĕн ĕçченĕсем килнĕ. «Иккĕмĕш çăкăра» юр айне хăвармаççех.
Сăмах май каласан, комсомольскисен çĕр улми лаптăкĕ республикăра чи пысăкки. Çанталăк çумăрсăр тăрсан ăна çак эрне вĕçĕнче кăларса-пуçтарса пĕтерме палăртаççĕ. Çĕр улми пуçтарнă çĕре ял хуçалăх предприятийĕсенче ĕçлекенсене çеç мар, ытти организаци-учрежденисенче вăй хуракансене те анлăн явăçтараççĕ.
«Газпром межрегионгаз Чебоксары» ООО генеральнăй директорĕпе Кияметдин Мифтахутдиновпа район админи-страцийĕн ял хуçалăх пайĕн тĕп агрономĕ Илдус Минетуллин вара Александровка ял поселенийĕнче пулчĕç. Района Чăваш Республикин Патшалăх Канашĕн депутачĕ килнине пĕлсен Кивĕ Сĕнтĕрте пурăнакан ватăсем клуба пуçтарăннă. Вĕсене ялти фельдшерпа акушер пунктне хупни пăшăрхантарнине пĕлтерчĕç тĕл пулура. «Район больницине кайма пире, 70—80-ри çынсене, кансĕр. ФАП пулмасан аптека та çук, пĕр-пĕрин патне пуç ыратнине, ал-ура сурнине ирттерекен эмел шырама кайма тивет. Медпункта çĕнĕрен уçас ыйтăва татса пама пулăшсамăрччĕ. Унăн кабинечĕ тивĕçтермесен урăххине тупма, юсаса хатĕрлеме пулатех»,— терĕç вĕсем информушкăн членĕсене. Культура ĕçченĕсене вара клуб çурчĕ кивелсе пыни канăç памасть. Галинăпа Валерий Ванюркинсем ял халăхĕн канăвне тивĕçлĕ шайра йĕркелес тесе тăрăшаççĕ, анчах сивĕ, шыв юхтаракан çивиттиллĕ çуртра ĕçлесси ăшă çĕрти мар çав. Кунта хальлĕхе çĕр кăмрăкĕпе хутаççĕ, ăна та пулин перекетлеме тивет. «Çут çанталăк газне йышăнма котельнăй хатĕр, проект ĕçĕсем туса газ пăрăхне тăсма вара укçа-тенкĕ кирлĕ»,— ăнлантарчĕ Александровка ял поселенийĕн пуçлăхĕ Валерий Волков.
Хырай Ĕнел вăтам шкулĕн учителĕсемпе, «Слава» ЯХПК председателĕпе Михаил Буслаевпа иртнĕ тĕл пулура Информаци кунĕн темисене хускатрĕç, вĕрентекенсене, ял ĕçченĕсене пăшăрхантаракан ыйтусем тавра калаçрĕç.
Ытти ушкăнсем те тĕрлĕ ял поселенийĕсене, ĕç коллективĕсене çитрĕç, унта пурăнакансемпе тĕл пулусем йĕркелерĕç, ыйтусем çине хуравларĕç. Уйрăмах ЧР Президенчĕн «Чăваш Республикин ĕç ветеранĕ» ят пама право пур граждансен ушкăнĕ çинчен», «Коммуналлă пулăшу панă чухне Чăваш Республикинче пурăнакансен прависемпе саккунлă интере-сĕсене хÿтĕлемелли хушма мерăсем çинчен» Указĕсем пирки ытларах калаçрĕç, сÿтсе яврĕç.
Источник: "Каçал Ен"