19 октября 2011 г.
«Çĕнĕ вĕренÿ çулĕнче шкулсенче физкультура урокĕ эрнесерен виççĕ пулать. Вăл ачасен хускану активлăхне ÿстерме, сывлăхне çирĕплетме кирлĕ. Çĕнĕлĕх кашни вĕренекеншĕн, пĕрремĕшĕнчен пуçласа вун пĕрмĕш класс таранах. Виççĕмĕш физкультура урокне аэробикăпа, ритмикăпа, тренажер залĕнчи занятисемпе, шывра ишессипе улăштарма юрать. Ăна физкультура учителĕсем кăна мар, тренерсем те, хушма пĕлÿ паракан учрежденисен преподавателĕсем те ирттерме пултараççĕ».
Республика Президенчĕ Михаил Игнатьев «Хыпар» хаçата панă «Эпир — çирĕп аталану çулĕ çинче» интервьюран.
Иртнĕ эрне кун «Кĕтне» физкультурăпа спорт комплексĕнче спорта тата физкультурăна юратакансем пухăнчĕç. Унта районти ача-пăча искусство шкулĕн преподавателĕ Татьяна Иванова аэробикăпа (ритмикăпа) уçă урок ирттерчĕ. Вăл кĕрешÿ за-лĕнче пулчĕ. «Шел пулин те, маларах пĕлтерсен те шкул ачисем кунта килме кăмăл туман. Ар çынсем те тренажер залĕнче сахалăн пухăнаççĕ. Хĕл кунĕсенче çынсем, тен, ытларах пухăнĕç»,— пĕлтерчĕ Татьяна Евтихиевна урок йĕркеленĕ хыççăн.
Малалла калаçăва Комсомольскинчи техникăпа инвентаризаци бюровĕн тĕп бухгалтерĕ Элеонора Быкова тăсрĕ. «Аэробика занятийĕсене тахçантанпах çÿретĕп, вунă çула яхăн. Хускану вăл — пурнăç. Кăмăл-сипете çĕклекенни те çавах»,— терĕ Элеонора Анатольевна, ушкăнрисен шухăш-кăмăлне пĕлтерсе.
«Кĕтне» физкультурăпа спорт комплексне уçнăранпа нумай вăхăт иртмен-ха. Анчах та унти залсене, бассейна çын сахал çÿрет. Ман шутпа, район халăхне сывă пурнăç йĕркине явăçтарасси кунта тăрăшакансен тивĕçĕ çеç мар, çынсен хăйсен те спорт патне туртăм пулмалла.
Источник: "Каçал Ен"