19 октября 2011 г.
Октябрĕн 17-мĕшĕнче Комсомольскинчи культурăпа кану центрĕн ĕçченĕсен пуçарăвĕпе ирттерекен «Ракурс деятельности» сăн ÿкерчĕксен конкурсĕ малалла тăсăлчĕ. Хальхинче выставкăна Шурут ял поселенийĕнчи культура ĕçченĕсем хăйсен ĕçĕсене тăратрĕç. Вĕсенчен маларах Элпуç тата Хырхĕрри ял поселенийĕсенчи культура ĕçченĕсен ĕçĕсемпе паллашнăччĕ.
Мероприятие Комсомоль-скинчи культурăпа кану центрĕн ĕçченĕ Валентина Курицына ертсе пычĕ. «Шурут ял поселенийĕнчи культура ĕçченĕсем пысăк пултарулăхпа палăрса тăраççĕ. Вĕсен янăравлă сасси кураканăн чунне тыткăнлать, савăк кăмăл парнелет. Сăн ÿкерчĕксен выставкинче кăтартса пама тăрăшрĕç те ĕнтĕ вĕсем халăхпа мĕнле тачă çыхăну тытнине. Куракансем виçĕ эрне хушшинче шурутсен ĕçĕ-хĕлĕпе килсе паллашма пултараççĕ»,— терĕ Валентина Николаевна. Ун хыççăн район администрацийĕн культура секторĕн тĕп специалисчĕ Зинаида Мельникова, Комсомольскинчи культурăпа кану центрĕн ĕçченĕ Альбина Кокшина та сăмах илчĕç, конкурсра ăнăçу сунчĕç.
Мероприятире Галина Архипова, Вера Шагарова, Валентина Лакатош юрăçсем тата Валерий Фролов хут купăсçă юрă-кĕвĕпе пухăннисене савăк кăмăл парнелерĕç.
Юлашкинчен Шурут ял поселенийĕнчи культура ĕçченĕсем те сăмах илчĕç. «Хатĕрленĕ сăн ÿкерчĕксенче хамăр ĕç-хĕле туллинрех кăтартса пама тăрăшрăмăр. Вĕсемпе паллашакансен сĕнÿ-канашне малашнехи ĕçре тĕпе хурăпăр»,— терĕ Валерий Васильевич.
Источник: "Каçал Ен"