19 октября 2011 г.
Шкулта вĕреннĕ чухнех Левăран ÿссен кам пулан тесе ыйтсан: «Тракторист пулатăп. Тăван колхозра ĕçлетĕп»,— тенĕ. Паянхи кун Лев Витальевич «Çĕр улмие мухтав» агрофирмăра механизаторта тăрăшать. Ĕçчен те тăрăшуллă çынна ахальтен мар ĕнтĕ кăçал Чăваш Республикин Ял хуçалăх министерстви Хисеп грамоти парса хавхалантарнă.
Л.Пудовкин кунта 2005 çултанпа ĕçлет. Вăл яланах техникăна таса та юсавлă тытать. Ĕçрен хăраманскер, хĕрÿ тапхăрта, «иккĕмĕш çăкăр» кăларнă вăхăтра, иртен пуçласа каçчен вăй хурать, хиртен кĕме пĕлмест. «Лайăх çанталăкпа усă курса каçхине 9—10-чченех ĕçлетпĕр. Пĕлтĕрхипе танлаштарсан çĕр улми тухăçĕ пысăк, анчах та çумăрлă çанталăк ăна пухма чăрмантарать. Çавăнпа та уяр кунсенче кашни минутпа туллин усă куратпăр. Пĕтĕм вăя унта яратпăр»,— тет Лев Витальевич.
Халĕ опытлă механизатор «АВР» маркăллă комбайнпа çĕр улми уйĕнче тăрăшать.
«Унчченхи вăхăтра кивĕ комбайнпа ĕçленĕ чухне тăкак нумай курнă. Паянхи кун вара пачах та урăхла. Техникăна улăштарса, çĕнетсе пырасси патшалăх шайĕнче те — приоритетлă политика. Çĕнĕ комбайнсем хирте еплерех ĕçленине, комбайнерсен савăк кăмăлне курсан чăннипех те хĕпĕртетĕп»,— пĕлтерчĕ агрофирмăн генеральнăй директорĕ Хасиятулла Идиатуллин.
Лев Витальевич çемйипе Александровкăра тĕпленнĕ. Мăшăрĕ, Надежда Михайловна, чылай çул «Тав» компанинче ĕçлет. Туслă мăшăр икĕ хĕр пăхса çитĕнтернĕ.
«Çын ĕçпе илемлĕ»,— теççĕ ваттисем. Ĕçчен çынна ял савать текен каларăш та анлă сарăлнă халăхра. Ахальтен мар ĕнтĕ коллективра Л.Пудовкина хисеплеççĕ, сĕнÿ-канаш ыйтма та пыраççĕ.
Источник: "Каçал Ен"