15 октября 2011 г.
Иртнĕ кунсенче районти культурăпа кану центрĕнчи «Каçал» фольклор ансамблĕ Ульяновск облаçĕнчи Новоульяновск хулинче пулнă. Унта вăл «Чăваш культура кунĕ» фестивале хутшăнса хăйсен пултарулăхне кăтартнă.
«Мероприяти «Мир» культурăпа кану центрĕнче иртрĕ. Пухăннисем умĕнче Ульяновск облаçĕнчи чăваш наципе культура автономийĕн председателĕ Владимир Сваев салам сăмахĕ тухса каларĕ. Эпир кÿршĕ облаçри сцена çинче халăхăн 5 юррипе тата ташшипе куракансене савăк кăмăл парнелерĕмĕр. Уява пурĕ 15-ĕн хутшăнтăмăр. Вĕсене пурне те ятранах асăнас килет: В.Гаврилов, В.Григорьев, Н.Кисапов, В.Хораськина, З.Морозова, З.Егорова, А.Морозова, В.Шимонис, В.Константинова, Е.Воронова, Л.Карзакова, А.Владимирова, В.Яковлева тата Г.Быкова. Чăвашлăхшăн тунсăхланă куракансем ансамблистсен тумĕсене курса киленчĕç»,— терĕ ансамбль ертÿçи Владимир Павлов.
Куракансем «Каçал» фольклор ансамблĕн юрри-ташшине ăшшăн кĕтсе илнĕ, тăвăллăн алă çупса хавхалантарнă.
Фестивале пĕтĕмлетнĕ хыççăн ушкăна халăх пултарулăхĕн йăли-йĕркине упранăшăн тата аталантарнăшăн Диплом парса наградăланă. Çакна та палăртмалла: артистсен çул çÿревне хальхинче уява йĕркелекенсем тÿленĕ.
Источник: "Каçал Ен"