12 октября 2011 г.
РФ Патшалăх Думин тата ЧР Патшалăх Канашĕн депутачĕсен суйлавĕсемпе пĕрле декабрĕн 4-мĕшĕнче районти 3 ял поселенийĕнче вырăнти хăй тытăмлăх органĕсен суйлавĕ те пулать. Халĕ шăпах виçĕ шайри суйлавра суйлама кандидатсем сĕнес, регистрацилес ĕç анлăн пырать. Октябрĕн 7-мĕшĕнче Комсомольски территориллĕ суйлав комиссийĕ Комсомольски пĕр мандатлă 7-мĕш округĕпе Чăваш Республикин Патшалăх Канашĕн депутачĕ пулма тăратнă Валерий Ефимович КОЛЬЦОВА регистрациленĕ. Унăн кандидатурине Россия Федерацийĕн Коммунистсен партийĕ сĕннĕ. Валерий Ефимович 1952 çулта çуралнă, Комсомольскинче пурăнать, аслă пĕлÿллĕ, районти тĕп больницăн дерматовенерологĕ.
Хирти Сĕнтĕр тата Урмаел ял поселенийĕсен депутачĕсен Пухăвĕн депутачĕ пулас кăмăллисене те регистрациленĕ. Николай Германович СВЕТЛОВ 1970 çулта çуралнă, Хирти Ĕнел ялĕнче пурăнать, ятарлă вăтам пĕлÿ илнĕ, уйрăм предприниматель. Ăна пĕр мандатлă 4-мĕш суйлав округĕпе Хирти Сĕнтĕр ял поселенийĕн депутачĕсен Пухăвĕн депутачĕ пулма кандидата тăратнă. 1972 çулта çуралнă, Янкасси ялĕнче пурăнакан, тулли мар вăтам пĕлÿллĕ, Нĕркеç вăтам шкулĕнче газ операторĕнче ĕçлекен Валерий Витальевич КИРИЛЛОВА вара пĕр мандатлă 12-мĕш суйлав округĕпе асăннă ял поселенийĕн депутачĕсен Пухăвĕн депутачĕ пулма кандидата сĕннĕ.
Урмаел ял поселенийĕн депутачĕсен Пухăвĕн депутачĕн кандидатне Ильгизер Гилачович МИФТАХУТДИНОВА та Комсомольски территориллĕ суйлав комиссийĕ çав кунах регистрацилесе удостоверени панă. Ильгизер Гилачович 1964 çулта çуралнă, Урмаел ялĕнче пурăнать, аслă пĕлÿллĕ, вăхăтлăха ĕçсĕр. Ăна пĕр мандатлă 5-мĕш суйлав округĕпе кандидата тăратнă.
Источник: "Каçал Ен"