08 октября 2011 г.
Сентябрĕн 30-мĕшĕнче Андриян Николаев летчик космонавтăн тăван çĕрĕнче — Сĕнтĕрвăрри районĕнчи Шуршăл ялĕнче «Дорога в космос» наукăпа практика конференцийĕ иртрĕ. Ăна Ю.А.Гагарин космоса вĕçнĕренпе 50 çул çитнине халалланă.
Конференцие Чăваш Республикин Вĕренÿ, Культура министерствисен, «Байконур—Чебоксары» АСК представителĕсем, çамрăк космонавтсен пĕрлешĕвĕсен ертÿçисем тата ыттисем те хутшăнчĕç. Çавăн пекех конференцире Чĕмпĕр-тен, Хусантан, Чулхуларан килнĕ хăнасем те пулчĕç.
Çак мероприятие пирĕн районтан Тукай Мишер вăтам шкулĕнчи ИЗО учителĕ, ачасен хушма пĕлÿ центрĕнче краеведени кружокне ертсе пыракан Рушания Галимзяновна Зинатуллина хутшăнчĕ.
Космонавтика музейĕнче йĕркеленĕ конференци пысăк шайра иртрĕ. Мероприятие хутшăннисем çак ыйтусене сÿтсе яврĕç: «Космонавтикăна 50 çул»; «Космонавтсем чăваш поэчĕсемпе писателĕсен хайлавĕсенче», «Чăваш Республикин çамрăк космонавтсен отрячĕсен юхăмĕн «Нас зовут космические дали» программи. Конференцире «Байконур—Чебоксары» АСК президенчĕ В.П.Тихонов, Раççей Геройĕ, СССР тава тивĕçлĕ штурман-испытателĕ Г.Г.Ирейкин, çар наукисен докторĕ И.Н.Николаев полковник, Раççейри Геройсен ассоциацийĕн президенчĕн помощникĕ Р.М.Галимзянов, Чăваш халăх поэчĕ В.В.Туркай тата ыттисем те тухса калаçрĕç. Р.Г.Зинатуллинан ĕçĕ диплома тивĕçрĕ.
Наукăпа практика конференцине хутшăннисем мероприятипе кăмăллă юлчĕç, вăл ачасенче патриотизм туйăмне аталантарма пулăшассине палăртрĕç.
Источник: "Каçал Ен"