21 сентября 2011 г.
Кăçал пирĕн районти пĕрлешÿллĕ хуçалăхсем пурĕ 2 пин ытла гектар çинче çĕр улми çитĕнтернĕ. Сентябрĕн 20-мĕшĕ тĕлне ăна 409 гектар çинчен пуçтарса илнĕ. Хальлĕхе тухăç кашни гектар пуçне 190 ытла центнерпа танлашать. Хăш-пĕр хуçалăхсем çак ĕçе вĕçлесе те пыраççĕ. Районта 5—6 ял хуçалăх предприятийĕсĕр пуçне ыттисем «иккĕмĕш çăкăр» кăларма тухнă. Ку енĕпе «Слава картофелю» агрофирма, «Урожай» колхоз, Семеновăн, Г.Хайретдинован фермер хуçалăхĕсем ăнăçлă ĕçленине палăртмалла. Кăçал хуçалăхсем çĕнĕ вăрлăхсемпе ĕçленĕ, пысăк тухăç илес шанчăк пур. Хальлĕхе 1 килограмм çĕр улмин хакĕ 6—7 тенкĕпе танлашать.
Кĕр тыррисене акма та октябрь уйăхĕччен кая юлман-ха. Çак ĕçе сентябрĕн 20-мĕшĕ тĕлне 3593 гектар çинче пурнăçланă. Районта пахча çимĕçпе ĕçлекен ял хуçалăх предприятийĕсем нумаях мар. Вĕсене 10,5 гектар çинче çеç çитĕнтернĕ. Тĕпрен илсен, ку енĕпе «Комсомольские овощи» ООО тăрăшать. Районта кишĕр, хĕрлĕ чĕкĕнтĕр, купăста ытларах туса илеççĕ.
Августăн 20-мĕшĕ тĕлне 4014 гектар çинче çĕртме тунă. «Рассвет» (400 га), «Урожай» (335 га), «Труд» (250 га) хуçалăхсенче ĕçсем лайăх пыраççĕ.
Источник: "Каçал Ен"