21 сентября 2011 г.
Сентябрĕн 17-мĕшĕнче Шупашкарти «Олимпийский» стадионта прессăн спорт фестивалĕн финалти тапхăрĕ – «Советская Чувашия» хаçат парнисемшĕн эстафетăллă чупу иртрĕ. СССР космонавт летчикĕ, Совет Союзĕн икĕ хут Геройĕ, авиаци генерал-майорĕ Андриян Николаев ячĕпе ăна кăçалхипе 73-мĕш хут йĕркеленĕ.
Ăмăртусене 300 ытла команда – массăллă информаци хатĕрĕсенче, патшалăх влаçĕн органĕсенче, тĕрлĕ организаци-предприятисенче ĕçлекенсем, спорт çемйисем, ветеранĕсем, шкулсенче вĕренекенсем, студентсем, ĕç коллективĕсем — хутшăнчĕ.
Спорта юратакансене Чăваш Республикин Президенчĕ Михаил Игнатьев, «Советская Чувашия» хаçатăн тĕп редакторĕ Африкан Соловьев, Олимп чемпионĕ, ЧР Патшалăх Канашĕн депутачĕ Елена Николаева, Китайра иртнĕ Пĕтĕм тĕнчери Универсиада призерĕ Екатерина Горбунова саламларĕç, телейлĕ стартпа çĕнĕ рекордсем сунчĕç.
Йăлана кĕнĕ эстафета кăçал Михаил Игнатьев Президент ертсе пыракан VIP-чупупа пуçланчĕ. Унпа пĕрле Чăваш Ен правительствин председателĕ Олег Макаров, республикăри министерствăсемпе ведомствăсен представителĕсем, районсемпе хуласен пуçлăхĕсем старта тăчĕç. Пирĕн район тата район администраци пуçлăхĕсем Евгений Карпеевпа Геннадий Волков та айккинче юлмарĕç.
Кун хыççăн массăллă информаци хатĕрĕсенче тăрăшакансем старта тухрĕç. «Каçал ен» хаçат редакцийĕн водителĕ Владимир Тимофеев тата «Вакыт» хаçатăн операторĕ Зухра Галимзянова та 400 метрлă дистанцие чупса тухрĕç. Пирĕн район команди те çак фестивале хутшăнчĕ, анчах чылай вăйлăрах спортсменсене хыçа хăварас тесен нумай тăрăшмалла çав.
Источник: "Каçал Ен"