07 сентября 2011 г.
— Кооператив территори-йĕнчи пĕрчĕллĕ тата пăрçа йышши тырăсене пуçтарса кĕртнĕ. Пирĕн тата Йĕпреç районĕнчи Хурамал ялĕнче 200 гектар пур. Йĕтем çине халĕ унтан тырă килет, — пĕлтерчĕ «Пайгас» ял хуçалăх кооперативĕн йĕтем заведующийĕ Т.Н.Ильина сентябрĕн 1-мĕшĕнче.
Хуçалăх 268 гектар çинче тыр-пул çитĕнтернĕ. Ăна вырса çапнă çĕрте Сергей Трофимовпа Михаил Кудрявцев, Алексей Ильинпа Николай Яковлев экипажĕсем ĕçленĕ. Тăрăшуллăскерсем пĕрчĕллĕ тата пăрçа йышши тырăсене кĕске вăхăтрах пуçтарса илнĕ. Йĕтем çинчи ĕçсене 2 сменăпа йĕркеленĕ. Çакă килнĕ тырра çийĕнчех сăвăрса, алласа пырса складсене кĕртме май панă. Валентина Рамская, Наталья Хлебникова, Зоя Кудрявцева, Галина Кириллова, Нина Рамская куллен ĕçре пулнă. Фаина Самаркина, Ольга Киргизова, Тамара Карасева, Надежда Абрамова (вăл вăхăтра вĕсем кĕр тыррисен вăрлăхĕсене имçамланă çĕрте ĕçлетчĕç) та хастар вăй хунă. Зина Кураковăпа Оксана Николаева шкулта çеç вĕренеççĕ-ха. «Вырма пуçланнăранпах вĕсем йĕтем çинче вăй хунă. Питĕ маттурскерсем. Паян пĕрремĕш шăнкăрав пулнă пулин те, ун хыççăн йĕтем çине çитрĕç», — терĕ Тамара Николаевна.
Владимир Николаевич Ильин машинист тырă аллакан, сăвăракан агрегатсене пăхса тăрать, çĕмĕрĕлсен çийĕнчех юсать.
Хуçалăхра улăма пуçтарсах пынă. Халĕ хĕрсех кĕрхи çĕртме тăваççĕ, кĕр тыррисем акаççĕ. Уяр кунăн кашни саманчĕпе усă кураççĕ тăманлăвыçлисем.
Источник: "Каçал Ен"