27 августа 2011 г.
Чаплă ентешĕмĕрĕн, икĕ хут Совет Союзĕн Геройĕн, А.Николаев летчик космонавтăн палăкне Шупашкарта вырнаçтарас, ăна тума пулăшас тесе республикăри чылай çын укçа-тенкĕ хыврĕ. Пирĕн районти вăрçă тата ĕç ветеранĕсен ялсенчи пуçламăш организацийĕсем те, тивĕçлĕ канăва кайнă уйрăм çынсем те çак яваплă ĕçрен айккинче юлмарĕç. 39 пин те 890 тенкĕ укçа пуçтарса пачĕç. Ку ĕçе 652 ветеран хутшăнчĕ. Уйрăмах хастар ветерансен пуçламăш организацийĕсене палăртса хăварас килет. «Дружба» ЯХПК ветеранĕсем (совет председателĕ Е.Е.Иванов) 3950 тенкĕ, «Заря» ЯХПК (К.В.Жестянкина) 3880 тенкĕ, «Луч» ЯХПК 3590 тенкĕ, «Рассвет» ЯХПК (А.И.Андреев) 2870 тенкĕ укçа пуçтарнă. Çавăн пекех «Родина» фермер хуçалăхĕн, «Госсорткомиссия» ФГУн, «Восток» колхозăн, Кĕçĕн Каçал ялĕн ветеранĕсене те тав сăмахĕ каламалла. Вĕсем 2-шер пин тенкĕрен кая мар укçа хывнă.
«Химик» ОООра 9 ĕç ветеранĕ. Пуçламăш организаци председателĕ В.И. Пундяков тăрăшнипе вĕсем пурте çак ĕçе хапăлласа хутшăннă, пурĕ 750 тенкĕ пуçтарнă. Уйрăм çынсем çинчен те асăнмалла. Хирти Сĕнтĕрти И.Я.Салмин хăйĕн кĕсйинчен 1500 тенкĕ, Комсомольскинчи Р.П.Моисеев 500 тенкĕ, Аслă Çĕрпÿелĕнчи О.А. Кашкарова 1000 тенкĕ, «Уют» ООО ветеранĕ А.Н.Чаркина 200 тенкĕ панă. Палăка сентябрĕн 5-мĕшĕнче савăнăçлă лару-тăрура уçма палăртаççĕ. Вăл хатĕр, анчах та кивçенсене тÿлесе татма хальлĕхе укçа-тенкĕ çитмест. Тата 4 миллион тенкĕ кирлĕ. Пирĕн районта вăрçă тата ĕç ветеранĕсен пуçламăш 48 организацийĕ пур. Вĕсенчен 26-шĕ çеç çак акцие хутшăннă. Республика ятне чапа кăларнă ентешĕмĕр палăкĕшĕн ытти ветерансем те пăртак та пулин укçа-тенкĕ хывма пултараççех ĕнтĕ. Çакна вăраха ярас марччĕ.
Источник: "Каçал Ен"