24 августа 2011 г.
«Кĕнеке — пĕлÿ çăлкуçĕ» теççĕ халăхра. Вăл вĕренÿре кăна мар, ĕçре те, канура та яланах кирлĕ. Унпа туслашни, ăна вулани ăс-тăна пуянлатать. Çынсем вулавăш çуртне тĕрлĕ сăлтавпа çÿреççĕ. Кашнин ыйтнине тивĕçтерес тесе ырми-канми тăрăшаççĕ библиотека ĕçченĕсем. Час-часах литература каçĕсем, викторинăсем, конкурссем йĕркелеççĕ вĕсем. Йăлмахвари модельлĕ библиотека заведующийĕ Альбина Ефремова та çав тĕллевсемпех пурăнать.
А.Ефремова (хĕр чухнехи хушамачĕ Хораськина) Йăлмахва ялĕнче çуралса ÿснĕ. Альбина ултă ачаран виççĕмĕшĕ пулнă, хĕрсенчен — чи асли. Çавăнпа-и, тен, пĕтĕм ĕçе хăнăхтарнă ăна. «Анне, Ефросиния Николаевна, мĕн пенсие тухичченех «Знамя» колхозра ĕçленĕ. Хуçалăх вăл вăхăтра тем тĕрлĕ пахча çимĕç те ÿстеретчĕ. Эпир, шкул ачисем, каникул кунĕсенче, аннесемпе юнашар тăрса миçе гектара çум курăкран тасатман-ши? Хĕвел çатма çинче ăшаланă пек хĕртсе пăхнă çанталăкра ĕçлесе «пиçсе» кайса мĕн чухлĕ асапланса выртман-ши?» — тет Альбина, шкул çулĕсене аса илсе.
1983 çулта, Хирти Мăнтăр вăтам шкулĕнчен вĕренсе тухсан, Альбина Çĕрпÿри культурăпа çут ĕç училищине библиотекарьсем хатĕрлекен уйрăма вĕренме кĕрет. Маттур та тăрăшуллă хĕр икĕ çултан лайăх паллăсемпе унтан вĕренсе тухать, алла диплом илет. Александровкăри библиотекăра ĕçлеме пуçлать.
«Паянхи кун та Александровка клуб директорне Елена Николаевнăна мана малтанах вĕрентсе пынăшăн тав сăмахĕ калатăп. Аслисем вăхăтлă, усăллă канашсем панипе ĕнтĕ 21 çула яхăн унта ĕçлерĕм. Йăлмахваран Александровкăна çитме 7 километр, кайса килме вара — 14. Хăш кунсенче икшер те хутланă пуль. Вăт ăçтан ман вăр-варлăх»,— тет шÿтлесе Альбина Георгиевна.
«Кама пăхса библиотекарь пулма ĕмĕтленнĕ-ха Эсир?» — çак ыйтăва памасăр чăтаймарăм вулавăш ĕçченне.
— Пирĕн класранах библиотекаре тăваттăн вĕренсе тухрăмăр. Эпĕ Йăлмахвари библиотекăра ĕçлекен З.Н.Григорьевăна кăмăлласа çак профессие алла илме ăнтăлтăм. Вăл пире яланах çапла сăмахсем калатчĕ: библиотекăна юратăр, унта çÿрекен ачасем мĕн пĕчĕкрен ăс-тăнлă, анлă тавра курăмлă çитĕнеççĕ. Зинаида Николаевна, тивĕçлĕ канура пулсан та, библиотекăра иртекен пур мероприятисене хутшăнать. Вырăнлă сĕнÿ-канаш пама та ÿркенмест,— пĕлтерчĕ Альбина Георгиевна.
Нумай вулакан çыннăн шухăшлав аталанăвĕ, культура шайĕ ÿснĕçемĕн ÿссе пырать. Çавăнпа вулавăш çуртĕнче ĕçлекенсен яланах шыравра пулмалла. Пĕлÿпе, опытпа усă курса яланах çĕннине шыраççĕ вĕсем. Урăхла май та çук. Унăн библиотеки çынсемшĕн яланах уçă.
1989 çулта Альбина Георгиевна пĕр ял каччипе, Алексей Анатольевичпа, çемье çавăрать. Водительте ĕçлекен каччă ăна хăйĕн ĕçченлĕхĕпе, тăрăшулăхĕпе, тирпейлĕхĕпе тата ытти лайăх енĕсемпе тыткăнланă.
Туслă та ĕçчен мăшăр икĕ ача çуратса ÿстернĕ. Олег кăçал Чăваш патшалăх университетĕнчен хĕрлĕ дипломпа вĕренсе тухрĕ. Хĕрĕ Ирина та çав вĕренÿ заведенийĕн студенчĕ. Экономиста вĕренет, «5» паллăсемпе кăна ĕлкĕрсе пырать.
Альбина Ефремовăшăн телей вăл — юратнă ĕç, ача-пăча сывă ÿсни, юнашар ăнланакан мăшăр пулни... «Хунямапа-хуняçапа 22 çул пĕр кил-çуртра пурăнатăп. Шел пулин те, иртнĕ çул 80-ри хуняма çĕре кĕчĕ. Шăкăл-шăкăл калаçса пурăнатпăр çемьере. Чи кирли вăл — ваттисен сĕнĕвĕсене тĕпе хурасси... Тата пĕр-пĕрне хисеплесси»,— терĕ юлашкинчен А.Ефремова.
Мăшăрĕпе те килĕштерсе пурăнать вăл. Мĕнре-ши вăрттăнлăх?
— Пĕр-пĕрне усал сăмах калама мар, пĕчĕк ÿпкев çинчен пĕлтерме те ĕлкĕрейместпĕр эпир. Пĕри е тепри çавăнтах урăх ĕçе пикенет те — сивĕ сăмах каласси пирки мансах каятпăр. Пурнăç кĕске, çĕр çинче эпир хăнара кăна, çавăнпа вăрçăнма вăхăт та çук,— терĕ йăл кулса телейлĕ хĕрарăм.
Источник: "Каçал Ен"