20 августа 2011 г.
Августăн 18-мĕшĕнче Чăваш Республикин Президенчĕ Михаил Игнатьев Чăваш Ен Президенчĕн должноçне йышăннăранпа çулталăк çитнĕ ятпа журналистсемпе пресс-конференци ирттернĕ. Тĕл пулу ЧР Наци библиотекинче иртнĕ.
Пресс-конференцие республикăри, районсемпе хуласенчи пичет тата электронлă массăллă информаци хатĕрĕсен представителĕсем хутшăннă. Шупашкара килсе çитнĕ алла яхăн журналист республика ертÿçине ыйту пама кăмăл тунă.
Пресс-конференцие уçнă май, Президент Чăваш Республики экономика кризисĕнчен пĕчĕккĕн тухса пынине палăртса хăварнă. Макроэкономика кăтартăвĕсем те аванланаççĕ. Чăваш Ен Правительстви хăй çине илнĕ ыйтусене пĕтĕмпех пурнăçласа пырать, çав шутрах социаллă сферăна лайăхлатассине те. Вĕрентÿпе сывлăх сыхлавĕн ĕçĕсене тĕпрен çĕнетсе ылмаштарасси те курăмлăнах пурнăçланса пырать. Тапхăр-тапхăрпа бюджет ĕçченĕсен шалăвне ÿстереççĕ. Республикăн патшалăх умĕнчи парăмĕ те чакнă. Чăваш Енре тĕллевлĕ 64 программа ăнăçлă пурнăçланса пырать. «Çитес вăхăтрах эпир тăлăх ачасен çурт-йĕр ыйтăвне пĕтĕмпех татса парăпăр, çакăн валли укçа-тенкĕ пур, - палăртнă Президент. – Ача сачĕсенче вырăн çитменнипе çыхăннă ыйтăва вара 3 çулта татса пама пултарăпăр».
«Массăллă информаци хатĕрĕсем – хăватлă вăй. Хаçат-журнал, радиопа телевидени, юлашки çулсенче Интернет та, халăхăн тавра курăмне ÿстерме пулăшаççĕ, обществăлла шухăш-кăмăла пысăк витĕм кÿреççĕ», - уйрăммăн палăртсах каланă республика ертÿçи.
Журналистсемпе йĕркеленĕ калаçура Михаил Васильевич тĕрлĕ ыйту тавра калаçу хускатнă. Вăл шутрах республикăн юлашки тапхăрти социаллă экономика аталанăвĕн тĕп çул-йĕрне те тишкернĕ. Михаил Игнатьев çынсен пурнăç условийĕсене лайăхлатас тĕлĕшпе нумай ĕç тума май килни çинчен пĕлтернĕ. Бюджет тытăмĕнче ĕçлекенсен ĕç укçин шайне ÿстерни те хăйне евĕр пулăшу. Пĕчĕк предпринимателлĕхе аталанма май паракан условисем тăвассине те пысăк тимлĕх уйăрнине каласа хăварнă. Ыйтусем хушшинче Чăваш наци телерадиокомпанийĕ хăçан ĕçе пуçăнас ыйту та хăйĕн хуравне тупнă. Ĕçе авăн уйăхĕн вĕçĕнче е юпа уйăхĕн пуçламăшĕнче пурнăçа кĕртме шутлани çинчен пĕлтернĕ. Программăра Чăваш Республикин патшалăх чĕлхисемпе - чăвашла тата вырăсла кăларăмсем пулĕç. Пуласлăхра ăна Интернетпа ытти регионсенчи пур халăх та курма пултарĕ.
Журналистсене тĕрлĕ ыйту хумхантарнă. Конференции кĕ сехете яхăн тăсăлнă. Пресс-конференцире Михаил Игнатьев Президент журналистсен вăтăра яхăн ыйтăвне хуравланă. Юлашкинчен, пĕтĕм ыйтăва хурав панă хыççăн, малалла та çакăн пек пĕр-пĕрне ăнланса килĕштерсе ĕçлесе пыма, халăха кăсăклантаракан ыйтусене вăхăтра вĕсем патне илсе çитерме хушса хăварнă республика ертÿçи. «Пирĕн сирĕнпе пĕр тĕллев - çынсен пурнăçне лайăхлатасси. Сире уçă калаçушăн тав тăватăп», - тенĕ Михаил Васильевич тĕл пулăва вĕçленĕ май
Источник: "Каçал Ен"