17 августа 2011 г.
Вăтам шкул пĕтерни çинчен алла аттестат илсенех чылай çамрăк аслă пĕлÿ илме ăнтăлать. Анчах вĕсенчен хăшĕ-пĕри ячĕшĕн çеç, дипломшăн кăна, студент пулса пурăнать. Çав вăхăтра çине тăрсах, «наука гранитне кăшлакансем» те сахал мар.
Вăрманхĕрри Чурачăк каччи Евгений Петров — И.Н.Ульянов ячĕллĕ Чăваш патшалăх уни- верситечĕн машиностроени факультечĕн 5 курс студенчĕ. Кашни кун лекцисене, практика занятийĕсене çÿрени уншăн çителĕксĕр. Вăл наукăн анлă та тухмахлă çулĕпе утса тĕпчев ĕçĕсем тума ĕмĕтленет. Ăсĕ-тăнĕпе, пĕлĕвĕпе мал туртăмлă пулнине кăтартса пама ĕлкĕрчĕ те ĕнтĕ.
2010 çулта РФ Вĕрентÿ тата наука министерствин 1031 "-лĕ приказĕпе Женя пултаруллă çамрăксен шутĕнче 30 пин тенкĕ преми илме тивĕçнĕ лауреат пулса тăчĕ. Ÿсĕмĕ унăн чăннипех те савăнмаллискер. Вăл — Раççей студенчĕсен олимпиадин призерĕ.
Кăçал çуркунне, апрельте, Ижевск хулинче машинăпа механизм теорийĕпе Пĕтĕм тĕнче олимпиади иртрĕ. Аслă шкулсен 18 команди (пурĕ 9 çĕр-шывран) çĕнтерÿшĕн хĕрÿллĕн тупăшрĕ. Россия чысне хÿтĕлекеннисем Ижевск, Волгоград, Кострома, Уфа, Самара, Южно-Уральск хулисен тата Пушкăрт, Чăваш патшалăх университечĕсем пулчĕç. Студентсен уйăрса панă 4 сехет хушшинче питĕ кăткăс 8 задача шутлама тиврĕ. Чăваш Ен çамрăкĕсен ушкăнĕ пĕтĕмĕшле командăсен зачетĕнче пĕрремĕш вырăна тухрĕ. Женя Петровăн кăтартăвĕсем — списокра 5-мĕш.
Çитĕнÿ çăмăллăн килмест. Паллах, çамрăкăн вĕренÿ туртăмĕ ачаранах пулнă. Комсомольски 2-мĕш вăтам шкулĕнче пĕлÿ пухнă вăхăтра Женя физика, математика предмечĕсене кăмăлланă. Çирĕп никĕс хывма Геннадий Николаевич Петров учитель те нумай тăрăшнă. Пултаруллă вĕрентекене пулах студентăн пĕлĕвĕ малалла ÿссе тарăнланса пырать.
Ял ачи çакăн евĕрлĕ çĕкленме пултарнишĕн савăнмалли çеç юлать. Вĕренес туртăм пысăк пулни çеç мар, ашшĕ-амăшĕн хавхалантарăвĕ те яланах кирлĕ. Галина Никандровнăпа Геннадий Тихонович Петровсем (Хырхĕрри ял поселенийĕпе «Восток» ЯХПК специалисчĕсем) ачисене тĕрĕс-тĕкел, ăслă-тăнлă ÿстерес тесе хăйсенчен мĕн килнине пĕтĕмпех тăваççĕ. Вĕсен шанăçĕ малашне те тÿрре тухса пытăр.
Источник: "Каçал Ен"