17 августа 2011 г.
Уяр кунăн кашни саманчĕпе усă курма тăрăшаççĕ районти ял хуçалăх предприятийĕсенчи ĕçченсем. Çапла пулмалла та. Çанталăкăн кăмăлне пĕлсе пĕтерме çук.
Августăн 16-мĕшĕ тĕлне районĕпе 7509 гектар çинче пĕрчĕллĕ тата пăрçа йышши тырăсене вырнă. Ку вăл пуçтарса кĕртмелли пĕтĕм лаптăкăн 62 проценчĕ чухлĕ пулать. 6991 гектарне çапса тĕшĕленĕ. Хальлĕхе тырă тухăçĕ кашни гектар пуçне 26,9 центнерпа танлашать.
8 хуçалăхра тыр-пултан пушаннă уйсенче çĕртме тăваççĕ. Уйрăмах çак ĕçе «Труд», «Восход» хуçалăхсенче лайăх йĕркеленĕ. «Урожай» колхозра 25 гектар кĕр тыррисем акнă. Ку ĕçе ытти хуçалăхсен те пуçламалла, хăвăртлатмалла. Шăпах çак тапхăрта кĕр тырри акмалли лайăх вăхăт.
Хальлĕхе 9576 тонна утă, 29153 тонна сенаж, 9047 тонна силос хатĕрленĕ. Ĕçсем малалла пыраççĕ. Уй-хирте иртен пуçласа сĕм çĕрлечченех трактор-машина сасси кĕрлесе тăрать.
Источник: "Каçал Ен"