17 августа 2011 г.
Августăн 13-мĕшĕнче Комсомольскинчи «Кĕтне» физкультурăпа спорт комплексĕнче Физкультурниксен кунне халалланă спорт уявĕ иртнĕ.
Сывлăхпа спорт уявне предприятисемпе организацисен ертÿçисем, ял тăрăхĕсенчи çамрăксем пуçтарăннă. Вĕсенчен кашниех спортăн тĕрлĕ енĕпе кĕрешсе пултарулăхне кăтартнă, сывлăхне çирĕплетнĕ.
Чи малтанах район администрацийĕн пуçлăхĕ Геннадий Волков спортсменсене ăнăçу суннă. «Юлашки çулсенче ытларах та ытларах çын сывă пурнăç йĕркине суйласа илет. Çавăнпа та кун пек мероприятисен шучĕ ÿссех пытăр»,— тенĕ Геннадий Федорович уява уçса.
Спорта юратакансем тĕрлĕ ăмăртусенче вăйĕсене виçнĕ. Акă пляжри волейбол вăййинче Шурут ялĕн команди çĕнтернĕ. А.Горневпа Е.Волков чăннипех ăста пулнине çирĕплетнĕ. Хĕр ачасенчен К.Салицевăпа Д.Боровкова пултарулăхпа палăрнă. Хĕрсемпе яшсем 100 метрлă дистанцие чупса ăмăртнă. Çакăнта арçын ачасенчен Д.Воробьев (Комсомольски) пĕр-ремĕш, Д.Тимаевпа Д.Гайнуллов (иккĕшĕ те Чĕчкенрен) иккĕ-мĕшпе виççĕмĕш вырăнсене тивĕçнĕ. Хĕр ачасенчен А.Шикарева (Аслă Чурачăк) пĕрремĕш, А.Владимирова (Комсомольски) иккĕмĕш, Е.Лукина (Александровка) виççĕмĕш вырăнсене çĕнсе илнĕ.
Физкультурниксен кунĕнче район спортсменĕсем ФСКра бассейнра пĕрремĕш хут ишсе ăмăртрĕç. 25 метрлă дистанцире А.Петровпа С.Алексеева (иккĕшĕ те нĕркеçсем) чи лайăх кăтартусемпе палăрнă.
Стритбол вăййине пурте пĕлсе те пĕтереймеççĕ пулĕ. Урăхла каласан урамри баскетбол вăл. Стритбол ăмăртăвĕнче Комсомольски команди — И.Токмаков, Д.Краснов, С.Родионов — «ылтăн» медале тивĕçнĕ.
Шашка вăййине юратакансене Сергей Зайцев (Çĕнĕ Сĕнтĕр) ăсталăхĕпе савăнтарнă.
400-пе 1000 метрлă дистанцисенче И.Андреева («Луч» ЯХПК) тата П.Мартынов (Хырай Ĕнел) чи пултаруллисем пулнă, пĕрремĕш вырăна тивĕçнĕ.
Уяв вĕçлениччен спортсменсене саламлама ЧР Патшалăх Канашĕн депутачĕ Кияметдин Мифтахутдинов çитнĕ. Вăл шашка вăййисенче палăрнисене хаклă парнесем парса чысланă.
Пĕр япала пăшăрхантарать. Районта хĕрÿ вырма кунĕсем пулнă май, аслăрах çулсенчисем çак спорт мероприятине активлăрах хутшăнаймарĕç.
Источник: "Каçал Ен"