10 августа 2011 г.
Юрий Долгов Киров поселокĕнче çуралса ÿснĕ. Паянхи кун вăл — «Слава картофелю» агрофирмăра электрикре ĕçлет. Нумаях пулмасть ăна ĕçри пултарулăхĕшĕн Хисеп грамоти тата хаклă парне парса чысларĕç.
Ю.Долгов мĕн пĕчĕкрен электрик пулма ĕмĕтленнĕ. Шкулта физика предмечĕпе лайăх паллăсемпе кăна вĕренекене çак профессие алла илме пĕртте йывăр пулман.
Юрăн ашшĕ, Аркадий Гордеевич, Дубовка кирпĕч заводĕнче мастерта вăй хунă. Ĕçе хăнăхтарас тесе ашшĕ ачисене кашни çуллахи каникул кунĕсенчех заводра ĕçлеме явăçтарнă. «Ĕçлесе çинĕ çăкăр тутлăрах! — тенĕ вăл. Амăшĕ, Любовь Михайловна, тивĕçлĕ канăва кайичченех пуçламăш классене вĕрентнĕ.
Долговсем ачисемшĕн яланах ырă тĕслĕх вырăнĕнче пулнă.
«Кашни çыннăн ашшĕ-амăшĕ мĕн каланине тĕпе хурса пурăнмалла. Çакна хамăр ача-пăчаллă пулсан тин ăнкарса илетпĕр»,— терĕ Юрий Аркадьевич.
Ю.Долговăн ĕç кĕнекинче çырнă йĕркесем нумай мар. Вăл, 1993 çулта çар службинчен тăван ене таврăнсан, Киров ячĕллĕ колхозра ĕçлеме пуçлать. Каярахпа Дубовкăри кирпĕч заводне куçать.
«Слава картофелю» агрофирмăра вара — 2003 çултанпа. Кунтанах Ю.Долгова Шупашкарти професси паракан 8-мĕш училищĕне электрике вĕренме яраççĕ. Хăй ĕмĕтленнĕ профессие алла илетех арçын.
Мăшăрĕпе, Елена Николаевнăпа, икĕ хĕр ÿстереççĕ. Туслă çемье, аслисен пехилне тĕпе хурса, ачисене те мĕн пĕчĕкрен ĕçе хăнăхтарать. «Ÿркенмен ăста пулнă»,— теççĕ вĕсем.
Источник: "Каçал Ен"