10 августа 2011 г.
Чернобыльти атом станцийĕнче хăрушă инкек пулнăранпа кăçалхи апрелĕн 26-мĕшĕнче 25 çул çитрĕ. Çав авари пулăмĕсене пĕтерме пирĕн районтан 7 арçын хутшăннă. Хăйсен пурнăçне, сывлăхне хĕрхенмесĕр катастрофа пулнă вырăнта ĕçленĕ вĕсем. Шел, çак куна иккĕшĕ кĕтсе илеймерĕç, пурнăçран вăхăтсăр уйрăлса кайрĕç.
Августăн 8-мĕшĕнче район администрацийĕн залĕнче Чернобыль АЭСĕнчи аварие пĕтерме хутшăннисем пуçтарăнчĕç. Валерий Козлова, Рафик Фасхутдинова, Авенир Иванова, Владимир Порядковпа Николай Чапрасова район администрацийĕн пуçлăхĕ Г.Ф.Волков асăну медалĕсем çакса ячĕ. Награда илнисене Геннадий Федорович çĕр-шыв умĕнчи тивĕçне тÿрĕ кăмăлпа пурнăçланăшăн тав турĕ, вĕсене ырлăх-сывлăх, ăнăçу сунчĕ.
Чернобыль ахрăмĕ çĕр-шыв историйĕнче çеç мар, уйрăм çыннăн пурнăçĕнче те тарăн йĕр хăварчĕ.
Источник: "Каçал Ен"