30 июля 2011 г.
Александровкăри фельдшерпа акушер пунктĕнче Гузелия Ямалиева 1996 çултанпах ĕçлет. Вăл, Урмаелĕнче çуралса ÿснĕскер, вăтам шкултан вĕренсе тухсан Шупашкарти медицина училищинче фельдшер-акушер специальноçне алла илет. Ун хыççăн Гузелия Çĕнĕ Шупашкарти хула больницинче инфекци уйрăмĕнче чирлисене сыватать. Каярахпа вара тăван ене таврăнать, Луцки салинче тĕпленет. Мăшăрĕпе икĕ ывăл çитĕнтереççĕ. Таврари ялсенчи çынсем Гузелия Хасиятулловна пирки ырăпа кăна калаççĕ. «Ĕçне чунтан парăннă. Кирек хăш вăхăтра та пулăшма хатĕр вăл. Унăн çепĕç сасси темле эмелрен те паха»,— теççĕ ун пирки.
Оксана Михайлова санитаркăна та ял çыннисем хисеплеççĕ. Михайловсем çемйипе Вăрмар районĕнчен 10 çул каялла куçса килнĕ. Кĕске вăхăт хушшинче вăл та кÿршĕ-аршăра, ял-йышра ырă ята çĕнсе илнĕ.
...Паянхи кун Александровкăри фельдшерпа акушер пунктĕнче юсав ĕçĕсем пыраççĕ. «Кабинетра калама çук сивĕччĕ. Сывалма килнисене салтăнтарса итлеме те чăрмавсем пулнă. Иртнĕ кунсенче халăх вăйĕпе маччана, стенасене якатса сăрларăмăр. Халĕ шыв кĕртес тесе тăрăшатпăр. Укçи-тенкине ял халăхĕнчен пуçтартăмăр. Чи пысăк пулăшу — 10 пин тенкĕ — Чăваш Патшалăх Канашĕн депутачĕ Олег Викторов парса пулăшрĕ»,— пĕлтерчĕ хавхаланса фельдшер-акушер.
Халĕ кунта шыв кĕртмелли пăрăхсем хума çĕр чаваççĕ. Унсăрăн медпунктра малалла ниепле те ĕçлеме çук-çке, санитари правилисем çапла тума ыйтаççĕ.
Медицина пункчĕн ĕçченĕсем хăйсен вăхăчĕсене шеллемесĕр вĕсене юсав ĕçĕнче пулăшакансене те аса илчĕç. Вĕсем: Надежда Детнюкова, Елена Албутова, Ольга Уткина, Ирина Зайцева, Ирина Мухина, Константин Степанов, Валерий Чульмаков, Антон Поляков, Динар Ямалиев тата ыттисем те. «Слава» ЯХПК (председателĕ Михаил Буслаев) ĕçченĕсем те нумай пулăшу кÿреççĕ. Районти тĕп больница администрацийĕ те айккинче юлман иккен, газ котелĕ илсе панă.
Çитес эрнесенче медицина пункчĕн ĕçченĕсем ертсе пынипе пÿлĕмсене уйăрма пикенĕç. Сывалма килнисене хăтлă кабинетсенче Гузелия Ямалиевăпа Оксана Михайлова ăшă та ырă кăмăлпа кĕтсе илĕç.
Источник: "Каçал Ен"