23 июля 2011 г.
Эп çитнĕ çĕре фермăра ĕçлĕ шăв-шав тăратчĕ. Çаран çинчен килекен ĕнесене дояркăсем витесенче кĕтсе илчĕç. Картишĕнчи вăкăрсем канлĕн кăна сĕткенлĕ апата çиетчĕç.
Пĕр витере вара пĕчĕк пăрусен сассисем уйрăмах хыттăн илтĕнеççĕ. Эпĕ унта кĕрсен çамрăк чунсем мĕншĕн сас панине тÿрех ăнлантăм. Вĕсен «амăшĕ» — Галина Моисеевна Васильева — сĕт хатĕрлет. Тутлă шăрша сиссе, хырăм выççине туйса макăраççĕ хура-шурă тĕслĕ пĕчĕк выльăхсем.
Чĕрĕк ĕмĕр ытла ĕçлесе миçе пăру ÿстермен-ши кунта Г.Васильева! Ачасене пăхнă пек пăхать вăл вĕсене. Вăхăтра çитермелле, ай сарăмне тасатмалла. Пăруламалли ĕнесен уйрăмĕнче вăй хураканскер, ферма ĕçченĕ куç хупмасăр ирттернĕ каçсем пайтах пулнă.
«Ферма» сăмаха илтсенех теприсем унта шăршлă, тислĕклĕ, тасамарлăх тесе тута пăрасшăн. Анчах эпĕ Асанкасси ферминче пулнă хыççăн урăхларах шухăшлатăп. Галина Моисеевна ĕçлекен витере тасалăх, тирпейлĕх хуçаланать.
Мăшăрĕ те, Вячеслав, кунтах вăй хурать, тракторпа апат илсе килет. Тата вĕсен пĕчĕк хĕрĕ — тăваттăри Ирина — ĕçченлĕхĕпе тĕлĕнтермеллипех тĕлĕнтерчĕ. Амăшĕпе пĕрле кăкаркăçри ĕнесене курăк пачĕ, унтан тислĕк тасатрĕ, пăрусене соскăран сĕт ĕмтерчĕ. Çакăн пек маттур çынсем «Асаново» ЯХПКра чăннипех те нумай.
Источник: "Каçал Ен"