13 июля 2011 г.
Иртнĕ шăматкун Комсомольскинчи Хĕр уçланкинче кунĕпех хаваслă шăв-шав тăчĕ. Кунта Чăваш Республикинчи патшалăх влаçĕн тата вырăнти хăй тытăмлăх органĕсен Х физкультурăпа спорт Спартакиадин çуллахи тапхăрĕ иртрĕ. Ăмăртăва хутшăнакансене Чăваш Республикин Министрсен Кабинечĕн Председателĕн çумĕ — Президент Администрацийĕн ертÿçи Александр Иванов, физкультурăпа спорт, туризм министрĕ Анатолий Николаев тата Комсомольски район администрацийĕн пуçлăхĕ Геннадий Волков саламларĕç, ăнăçу сунчĕç.
Тĕрлĕ шайри чиновниксем хутăшла эстафетăра, мини-футбол турнирĕнче, канат туртса тата мини-гольфра вăй виçрĕç. Пурĕ 50 команда пуçтарăннă, вĕсенче 600-е яхăн çын. Вăйăсене ахаль специалистсенчен пуçласа министрсем таранах хутшăнчĕç. Акă Президент Администрацийĕн ертÿçи Александр Иванов пуринпе пĕрлех тапса канат туртрĕ, гольфра та хăйĕн çивĕчлĕхне тĕрĕслерĕ. Спорт министрне должноçĕ те çапла пулма хистет пуль те, Анатолий Аверкиевич кашни ăмăртăва тенĕ пекех хутшăнчĕ. Мини-футболта вара икĕ министр — Анатолий Николаевпа Сергей Павлов ертсе пыракан командăсем тĕл пулчĕç. «Спортсменсем» Ял хуçалăх министерствин ĕçченĕсене 2:0 шутпа парăнтарса çĕнтерÿçĕ ятне тивĕçрĕç. Хĕрарăмсенчен культура министрĕн заместителĕ Татьяна Казакова, федераллă казначействăн ертÿçи Ирина Клюкова мини-гольф вăййине хутшăнчĕç.
Çĕнтерÿçĕсене 4 ушкăнра палăртрĕç: ĕç тăвакан органсен, федераллă ведомствăсен Чăваш Енри уйрăмĕсен, вырăнти хăй тытăмлăх тата районсенчи ял поселенийĕсен пуçлăхĕсен командисем хушшинче. Чи çивĕччисемпе хăвăрттисем Юстици, Шалти ĕçсен министерствисен, Канаш райадминистрацийĕн тата Вăрмар районĕнчи ял поселенийĕсен пуçлăхĕсем пулчĕç. Вĕсем хутăш эстафетăра (пневматикăллă пăшалран пересси, велосипедпа тата çуран чупасси) çĕнтерчĕç. Мини-футболта вара ШĔМ футболисчĕсем МЧСри ĕçтешĕсенчен выляса илчĕç, Шупашкар хула администрацийĕ Элĕк командине кая хăварчĕ.
Канат туртакансем чашлаттарса çăвакан çумăра та пăхмарĕç. Ар çынсене куракансем тем тĕрлĕ хавхалантарчĕç. Кунта тĕрлĕ ушкăнсенче Гостехнадзор, УФСИН тата Патăрьел район администрацийĕн командисем çĕнтерÿçĕ пулчĕç.
Комсомольски районĕнчи ял поселенийĕсен пуçлăхĕсен туслă ушкăнĕ те пĕр вăйăран та юлмарĕ. Хутăшла эстафетăра каçалсем иккĕмĕш вырăн йышăнчĕç, канат туртса вара виççĕмĕшсем пулчĕç.
Ăмăртăва хутшăнакансем вăйăсемпе кăмăллă юлчĕç. Çут çанталăк ытамĕнче яра кун пулни, турнирсене хутшăнни вăй-хал парать, чуна çĕклет-çке.
Источник: "Каçал Ен"