13 июля 2011 г.
«Слава картофелю» агрофирма» ООО çулсеренех «Уй-хир кунне» йĕркелессине йăлана кĕртнĕ ĕнтĕ. Акă кăçал та июлĕн 9-мĕшĕнче тĕрлĕ регионсенчен – Тутарстан, Мари, Мордва, Удмурт республикисенчен, Киров, Волгоград, Чĕмпĕр тата ытти облаçсенчен килсе çитнĕ хăнасем çĕр улми туса илес енĕпе пĕр-пĕрин опычĕпе паллашрĕç, «иккĕмĕш çăкăра» лартнă уйсене çитсе курчĕç. Семинара 150 çын ытла хутшăнчĕ.
Çĕр улми туса илес енĕпе республикăра кăна мар, Раççейре те палăрса тăрать «Слава картофелю» агрофирма. Ют çĕр-шывсенче те пĕлеççĕ ăна. Çитĕнтернĕ продукцие тĕрлĕ регионсене ăсатаççĕ. Иртнĕ çул апат-çимĕçре усă курмалли 700 тонна ытла çĕр улмие çĕр-шывăн тĕрлĕ кĕтесĕсене ăсатнă. Кунсăр пуçне агрофирма ытти культурăсемпе те ĕçлет, продукци туса илмелли лаптăксене çулсеренех ÿстерсе пырать.
«Уй-хир кунне» «Слава картофелю» агрофирма» ОООн генеральнăй директорĕ Хасият Идиатуллин уçрĕ, семинар тĕллевĕпе паллаштарчĕ. Ун хыççăн «АСК» ОООн директорсен совечĕн председателĕ Александр Капитонов, Чăваш Республикин ял хуçалăх министрĕ Сергей Павлов, район администрацийĕн ял хуçалăх пайĕн тĕп агрономĕ Илдус Минетуллин сăмах каларĕç. Сергей Владимирович «Слава картофелю» агрофирмăн пултаруллă механизаторне Лев Пудовкина Хисеп грамоти парса хавхалантарчĕ. Çавăн пекех кунтан тивĕçлĕ канăва тухнă Галина Алякинапа Вера Алексеевăна, Юрий Долгов механизатора Хисеп грамотисемпе тата хаклă парнесемпе чысларĕç.
Конференцзала пухăннисем «Çĕр улмие мухтав» ятлă презентаципе те паллашма пултарчĕç.
Агрофирмăра пултаруллă кадрсем ĕçлеççĕ. Механизаторсем те, рабочисем те ăста. Пур агротехника ĕçне те пахалăхлă пурнăçлаççĕ. Çĕр улмие кирлĕ пек упрама хранилищĕсем пур. Унта та çитсе курчĕç семинара хутшăнакансем. Пур çĕрте те тасалăх, тирпейлĕх хуçаланнине палăртрĕç вĕсем.
Ĕçлĕ ушкăн малалла «иккĕмĕш çăкăр» пуссине çул тытрĕ. Тип-тикĕс те ем-ешĕл курăнакан йăрансем çине куç илмесĕр пăхас килет.
Вăрлăх тухăç никĕсĕ пулнине питĕ лайăх ăнланаççĕ «АСК» ООО ĕçченĕсем. Çулсеренех вĕсене çĕнетсе тăраççĕ. Паянхи кун «Невский», «Удача», «Импала», «Артемис», «Ред Скарлетт», «Пикассо», «Романце», «Романо» лартса пысăк тухăç илеççĕ. Хăнасене тĕп агроном Алексей Селиванов, Дамир Камальдинов агроменеджер, Александр Павлов инженер вăл е ку сорт пахалăхĕ, тухăçлăхĕ çинчен тĕплĕ каласа пачĕç, «иккĕмĕш çăкăр» туса илмелли çĕнĕ оборудованипе паллаштарчĕç.
Семинара хутшăнакансем çĕнĕ йышши техника, ÿсен-тăрансене чиртен, сиенлĕ хурт-кăпшанкăран хÿтĕлемелли им-çамсем туса кăларакансемпе тата сутакансемпе курса калаçрĕç. Ыйтусем çине «Сев-ЗапАгро» ООО ертÿçи Екатерина Шкрабак, «Сингента» ООО агроменеджерĕ Татьяна Деренко, «Гринтек» ООО генеральнăй директорĕ Виктор Мохов, «Колнаг» ЗАО менеджерĕ Александр Пищаев хуравларĕç.
Семинар ĕçĕ агрофирмăн конференци залĕнче малалла тăсăлчĕ.
Пухăннисене юлашкинчен «Çавал» ансамбль юрă-ташă парнелерĕ.
Семинар çÿлти шайра иртнине пурте палăртрĕç.
Источник: "Каçал Ен"