02 июля 2011 г.
Пирĕн районта тĕрлĕ халăх çынни пурăнать. Чăвашсемпе тутарсем те, вырăссем те, ытти халăхсем те пĕр чĕлхе тупаççĕ. Пурнăç пурнăçах, тепĕр чухне хирĕçÿ те тухса кайма пултарать. Малашне те килĕштерсе пурăнас, ĕçлес тĕллевпе район администрацийĕнче йĕркелĕхе пăсассине хирĕç профилактика комиссийĕ ĕçлет. Çак кунсенче вĕсен черетлĕ ларăвĕ иртнĕ.
Пирĕн районта пурăнакан халăх йышĕнчен 69,2 проценчĕ — чăвашсем, 26,2 проценчĕ — тутарсем, 4,3 проценчĕ — вырăссем. Кунсăр пуçне ытти халăх та пурăнать. Районта 5 чиркÿ, 9 мечĕт пур. Çакăн пирки район администрацийĕн культура пайĕн пуçлăхĕ, ведомствăсем хушшинчи совет председателĕ В.С.Васильев чарăнса тăнă.
Ларура тĕрлĕ халăхсем хушшинчи хутшăнусене аталантарас енĕпе мĕнле ĕçсем туни пирки «Каçал ен» хаçат редакторĕ Л.Г.Шуряшкина, «Диагностикăпа консультаци центрĕ» МОУ директорĕ Ф.А.Матросова сăмах илнĕ. Вĕсем ку енĕпе пĕлтерĕшлĕ ĕçсем тунине палăртнă.
Ларура ачасене çу кунĕсенче ĕçпе тивĕçтерес ыйтăва та пăхса тухнă. Çак ыйту çинче район администрацийĕн вĕ-рентÿ пайĕн информаципе методика центрĕн директорĕ Л.М.Антонова тĕплĕн чарăнса тăнă.
Лару вĕçĕнче Комсомоль-ски, Кайнлăк тата Аслă Çĕрпÿел ял поселенийĕсенчи профилактика совечĕсен ĕçĕ-хĕлĕпе паллашнă. Аслă Çĕрпÿел, Кайнлăк ял поселенийĕсем лайăх ĕçленине палăртнă.
Ларура правăпа çыхăннă ытти ыйтусене те пăхса тухнă.
Источник: "Каçал Ен"